Barcelona ទាក់ទង​រួច​ស្រេច ក្រោយ​ដឹង​ថា Nico Williams នឹង​ផុត​កុងត្រា​ជាមួយ Athletic Bilbao នៅ​ចុង​បញ្ចប់​នៃ​រដូវកាល​នេះ

ក្លឹប​អ្នក​មាន​បុណ្យ Barcelona ត្រូវ​បាន​គេ​រាយការណ៍​ថា កំពុង​ទាក់ទង​ជាមួយ​ភ្នាក់ងារ​របស់ Nico Williams ដើម្បីត្រៀម​ចុះ​ហត្ថលេខា​លើ​ខ្សែប្រយុទ្ធ​រូប​នេះ​ពី Athletic Bilbao នៅ​ឆ្នាំ​ក្រោយ។ កីឡាករ​វ័យ​ក្មេង​រូប​នេះ ត្រូវ​បាន​គេ​ចាត់​ទុក​ជា​ខ្សែ​ប្រយុទ្ធ​មួយ​រូប​ដែល​កំពុង​ឡើង​ជើង និង​អាច​មាន​អនាគត​ដ៏​ភ្លឺ​ស្វាង​ទៅ​ថ្ងៃ​ក្រោយ​ផង​ដែរ។

Nico Williams ដែល​ជា​ប្អូន​ប្រុស​របស់​ខ្សែប្រយុទ្ធ Inaki Williams បាន​នៅ​ជាមួយ Athletic Bilbao តាំង​ពី​នៅ​ឈុត​យុវជន​ក្នុង​ឆ្នាំ 2013 មក​ម្ល៉េះ ដោយ​គាត់​ចាប់​ផ្ដើម​រីក​ចម្រើន​ជា​លំដាប់ មុន​ពេល​បង្ហាញ​ខ្លួន​ជា​មួយ​ក្រុម​ឈុត​ធំ​ជា​ដំបូង​នៅ​ឆ្នាំ 2021។ កីឡាករ​វ័យ 21 ឆ្នាំ​រូបនេះ​បាន​លេង​ឲ្យ​ក្រុម​របស់​លោក Ernesto Valverde សរុប​ចំនួន 89 ប្រកួត ដោយ​ស៊ុតបញ្ចូលទី​បាន 12 គ្រាប់ និង​បញ្ជូនបាល់​ឲ្យ​មិត្ត​រួម​ក្រុម​បាន​ចំនួន 11 ដង។

ទោះ​ជា​យ៉ាង​ណា​ក៏​ដោយ នៅ​ចុង​បញ្ចប់​នៃ​រដូវកាល​នេះ Nico Williams នឹង​ផុត​កុងត្រា​របស់​ខ្លួន​ជា​មួយ​ក្លឹប​បច្ចុប្បន្ន​ហើយ ដោយ​គាត់​នឹង​ចាកចេញ​ដោយ​គ្មាន​តម្លៃ​ខ្លួន។ របាយការណ៍​ពី Sport របស់​អេស្ប៉ាញ​បាន​អះអាង​ថា ក្លឹប Barcelona បាន​ទាក់ទង​ដើម្បី​ត្រៀម​ចាំ​នាំ​យក​កីឡាករ​ឆ្នើម​រូប​នេះ​ទៅ Camp Nou រួច​ជា​ស្រេច​ទៅ​ហើយ នៅ​មុន​រដូវកាល​ក្រោយ​ចាប់​ផ្ដើម។ Nico Williams ពិត​ជា​មាន​ភាគរយ​ខ្ពស់​បំផុត ក្នុង​ការ​ចូលរួម​ជាមួយ​ក្លឹប​យក្ស​កាតាឡាន់ ខណៈ​ដែល​គាត់​ជា​កីឡាករ​ផុត​កុងត្រា និង​ជា​កីឡាករ​សញ្ជាតិ​អេស្ប៉ាញ​ដែល​មាន​ទំនាក់​ទំនង​ល្អ​ជា​មួយ​កីឡាករ​ផ្សេងៗ​ទៀត​នៅ Barcelona។

ប្រភព: Sportsmole