Jadon Sancho ត្រូវ​ពិន័យ​មិន​ឲ្យ​ចូល​ហ្វឹកហាត់​ជាមួយ​ក្រុម​ឈុត​ធំ រហូត​ដល់​គេ​ចេញ​មុខ​សុំ​ទោស​គ្រូ​បង្វឹក​របស់​ខ្លួន និង​ក្លឹប

លោក Erik ten Hag ដែល​ជា​គ្រូ​បង្វឹក​របស់​ក្លឹប​បិសាចក្រហម Manchester United ចង់​ឲ្យ Jadon Sancho សុំទោស​គាត់ ចំពោះ​ការ​បង្ហោះ​សារ​តាម​បណ្ដាញ​សង្គម​កាល​ពី​ប៉ុន្មាន​ថ្ងៃ​មុន ទើប​គាត់​អនុញ្ញាត​ឲ្យ​កីឡាករ​សញ្ជាតិ​អង់គ្លេស​រូប​នេះ ត្រឡប់​ទៅ​ហ្វឹកហាត់​ជាមួយ​ក្រុម​ឈុត​ធំ​វិញ។

កាល​ពី​ថ្ងៃ​ព្រហស្បតិ៍​ម្សិលមិញ​នេះ​ក្លឹប​បិសាចក្រហម Manchester United បាន​ចេញ​សេចក្តី​ថ្លែង​ការណ៍​មួយ​ថា Jadon Sancho បច្ចុប្បន្ន​កំពុង​ហ្វឹកហាត់​ដោយ​ខ្លួន​ឯង និង​រង់ចាំ​ការ​ដោះ​ស្រាយ​បញ្ហា​វិន័យ​នៅ​ក្នុង​ក្រុម។ ខ្សែប្រយុទ្ធ​ស្លាប​រូប​នេះ​បាន​បដិសេដ​មិន​ព្រម​សុំទោស​គ្រូ​បង្វឹក​របស់​ខ្លួន​ឡើយ ដោយ​លើក​ឡើង​ថា រឿង​នេះ​គឺ​លោក Erik ten Hag គឺ​ជា​អ្នក​បង្ករ​ឡើង​មុន។

យោងតាម Sky Sports បាន​ឲ្យ​ដឹង​ថា លោក Erik ten Hag នឹង​នៅ​តែ​ឈរ​ក្នុង​គោលជំហរ​ដ៏​ម៉ឺងម៉ាត់​ជាមួយ Jadon Sancho ដោយ​សារ​គាត់​មិន​ចង់​ឲ្យ​កីឡាករ​ផ្សេងៗ​ទៀត​ធ្វើ​បែប​នេះ​ជាមួយ​ខ្លួន។ ដូច្នេះ​ហើយ​ដាច់​ខាត Jadon Sancho ត្រូវ​តែ​សុំទោស​គាត់ និង​ក្លឹប ទើប​គេ​អាច​វិល​ចូល​ហ្វឹកហាត់​ជាមួយ​ក្រុម​ឈុត​ធំ​វិញ​បាន។

ប្រភព: Dailypost NG