បាល់ទាត់អន្តរជាតិ
Barcelona ប៉ះគីឡូធ្ងន់ Sevilla នៅម៉ោង 2 រំលងអាធ្រាតនេះ
ក្រុមការពារតំណែងជើងឯកអេស្ប៉ាញ FC Barcelona នឹងបើកទ្វារទទួលស្វាគមន៍ក្រុមភ្ញៀវ Sevilla នៅម៉ោង 2:00 រំលងអាធ្រាតនេះ ដែលជាការប្រកួតក្របខណ្ឌកំពូល La Liga។ ថ្វីត្បិតតែបច្ចុប្បន្ន Sevilla កំពុងឈរនៅក្នុងលេខរៀងទី 12 ប៉ុន្តែពួកគេត្រូវបានអ្នកគាំទ្រចាត់ទុកជាក្រុមខ្លាំងមួយ ក្នុងចំណោមក្រុមធំៗផ្សេងទៀតនៅអេស្ប៉ាញ។
ការប្រកួតចុងក្រោយរបស់ Barcelona ធ្វើមិនសូវបានល្អឡើយ ដោយពួកគេបានត្រឹមស្មើ 1-1 ជាមួយ Mallorca ខណៈដែលប្រកួតចុងក្រោយរបស់ Sevilla ធ្វើបានយ៉ាងល្អ ដោយពួកគេបានលុតក្រុមភ្ញៀវ Almeria ក្នុងលទ្ធផល 5 ទល់នឹង 1។ យ៉ាងណាមិញ Barcelona ត្រូវបានគេរំពឹងថា នឹងព្យាយាមរកគ្រាប់បាល់តាមដែលអាចធ្វើទៅបាន ដើម្បីទទួលបានជ័យជំនះ និងបង្កើនទំនុកចិត្តរបស់ពួកគេមុនការប្រកួត UEFA Champions League ដ៏ធំដែលត្រូវជួបជាមួយ FC Porto។
ទន្ទឹមនឹងនេះដែរ ទោះ Sevilla បានចាញ់បីប្រកួតដំបូងរបស់ពួកគេក្នុងលីគ ប៉ុន្តែចាប់តាំងពីពេលនោះមក ពួកគេមិនដែលបរាជ័យឡើយ ដោយមានតែស្មើ និងឈ្នះប៉ុណ្ណោះ។ ដូច្នេះហើយការប្រកួតសម្រាប់ក្រុមរបស់លោក Xavi Hernandez នៅរំលងអាធ្រាតនេះ អាចនឹងមានភាពតានតឹងខ្លាំង។
ប្រភព: Barcablaugranes