Real Madrid នឹង​អវត្តមាន​កីឡាករ 4 រូប ក្នុង​ការ​ប្រកួត​ទល់​នឹង Napoli រំលង​អាធ្រាត​នេះ!!!

នៅ​ម៉ោង 2 រំលង​អាធ្រាតនេះ គឺ​ជា​ការ​ប្រកួត​វគ្គ​ជម្រុះ​ក្នុង​ពូល C នៃ​ក្របខណ្ឌ UEFA Champions League រវាង​ក្រុម​ម្ចាស់​ផ្ទះ Napoli និង Real Madrid។ យ៉ាង​ណា​មិញ នៅ​មុន​ការ​ប្រកួត​មក​ដល់ គេ​បាន​ដឹង​ថា ក្លឹប​អធិរាជស Real Madrid នឹង​អវត្តមាន​កីឡាករ​សំខាន់ៗ​មួយ​ចំនួន។

Real Madrid នឹង​មិន​អាច​ជួយ​ឲ្យ David Alaba ជា​ពី​របួស​បាន​ទាន់​ពេល​វេលា​សម្រាប់​ការ​ប្រកួត នៅ​ថ្ងៃ​អង្គារ​នេះ​ទល់​នឹង Napoli ឡើយ ដោយ​សារ​ខ្សែការពារ​រូប​នេះ​មាន​បញ្ហា​នៅ​ត្រង់​ក្រលៀន។ ស្រប​ពេល​ដែល Alaba មិន​បាន​ធ្វើ​ដំណើរ​ទៅ​ប្រទេស​អ៊ីតាលី មាន​ន័យ​ថា Nacho នឹង​ត្រូវ​ជំនួស​តំណែង​ជា​ខ្សែការពារ​កណ្តាល ជាមួយ​នឹង Antonio Rudiger។

Real Madrid នឹង​បន្ត​ការ​ប្រកួត​ដោយ​គ្មាន Eder Militao ដោយ​កីឡាករ​រូប​នេះ​នៅ​ព្យាបាល​​របួស ក្រោយ​ការវះកាត់​លើ​ជង្គង់ ACL តាំង​ពី​ដើម​រដូវកាល​នេះ។ Thibaut Courtois ក៏​នៅ​តែ​បន្ត​អវត្តមាន ហើយ Kepa Arrizabalaga នឹង​រ៉ាប់រង​តួ​នាទី​ជា​អ្នកចាំទី​ជម្រើស​ដំបូង​ដដែល។ ទន្ទឹម​នឹង​នេះ​ដែរ ខ្សែបម្រើ​វ័យ​ក្មេង Arda Guler ក៏​អវត្តមាន​ដូចគ្នា ដោយ​កីឡាករ​សញ្ជាតិ​ទួរគី​រូប​នេះ មាន​បញ្ហា​របួស​ភ្លៅ។

ប្រភព: Sportsmole