Barcelona ចង់​អនុវត្តន៍​ច្បាប់ថ្មី មិន​ទិញ​យក​កីឡាករ​អាយុ​លើស​ពី 30 ឆ្នាំ

នាយក​ផ្នែក​កីឡា​របស់​ក្លឹប​អ្នក​មាន​បុណ្យ Barcelona គឺ​លោក Deco ត្រូវ​បាន​គេ​រាយការណ៍​ថា ចង់​អនុវត្តន៍​ច្បាប់​ថ្មី​មួយ ដែល​ហាម​ឃាត់​ក្លឹប​មិន​ឲ្យ​ចុះ​ហត្ថលេខា​លើ​កីឡាករ​ដែល​មាន​អាយុ​លើស​ពី 30 ឆ្នាំ។ របាយការណ៍​ពី Diario Sport បាន​រាយការណ៍​ថា Deco កំពុង​ជជែក​ពិភាក្សា​ជា​មួយ Xavi Hernandez ដោយ​ចង់​ជៀវវាង​ការ​ចុះ​ហត្ថលេខា​ផ្ទេរ​កីឡាករ​ចាស់ៗ​បន្ថែម​ទៀត។

យ៉ាង​ណា​មិញ កាល​ពី​ដើមរដូវកាល​នេះ Barcelona បាន​នាំយក​កីឡាករ​លើស​អាយុ 30 ឆ្នាំ​ចំនួន 3 នាក់ ដែល​ក្នុង​នោះ​មាន Oriol Romeu, Inigo Martinez និង Ilkay Gundogan។ ពាក់ព័ន្ធ​នឹង​រឿង​នេះ​ដែរ Deco គិត​ថា កីឡាករ​លើស​អាយុ​ដែល​ពួក​គេ​មាន​គឺ​គ្រប់គ្រាន់​ពេក​ហើយ។

កីឡាករ​អាយុ​ច្រើន បើ​ទៅ​បី​ជា​ពួក​គេ​មាន​បទពិសោធន៍​ចាស់​ទុំ និង​មិន​ចាំ​បាច់​ចំណាយ​ប្រាក់​ផ្ទេរ​ធំ​ដុំ ប៉ុន្តែ​ពួកគេ​ក៏​មិន​អាច​មាន​តម្លៃ​ខ្លួន​ក្នុង​ការ​លក់​ចេញ​ទៅ​វិញ​ដែរ ហើយវា​ក៏​អាច​ជា​ផ្នែក​មួយ​ប៉ះពាល់​ដល់​បញ្ហា​ហិរញ្ញ​វត្ថុ​របស់​ក្លឹប។ ប្រសិន​បើ​ច្បាប់​នេះ​ត្រូវ​បាន​អនុវត្តន៍ រឿង​ដ៏​គួរ​ឲ្យ​ចាប់​អារម្មណ៍​មួយ​នឹង​លេច​ឡើង គឺ​ពាក់ព័ន្ធ​នឹង​ខ្សែការពារ Joao Cancelo។ កីឡាករ​សញ្ជាតិ​ព័រទុយហ្គាល់​រូបនេះ​បច្ចុប្បន្ន​ជា​កីឡាករ​ខ្ចី​ជើង​ដែល Barcelona ត្រៀម​នឹង​ទិញ​ផ្ដាច់​កុងត្រា ប៉ុន្តែ​គាត់​នឹង​មាន​អាយុ 30 ឆ្នាំ ក្នុង​ខែ​ឧសភា​ឆ្នាំ​ក្រោយ។

ប្រភព: Barcablaugranes