បាល់ទាត់អន្តរជាតិ

Thierry Henry មិនហ៊ានស្រមៃក្លាយជាគ្រូបង្វឹកដែលអាចដឹកនាំ Arsenal

Published

7 months ago

October 16, 2023

Lee Lee

អតីតកីឡាករឆ្នើម Thierry Henry បានផ្តល់ចម្លើយនៃការឆ្លើយតបមួយដ៏គួរឲ្យកត់សម្គាល់ នៅពេលត្រូវបានគេសួរថា តើគាត់ចង់ក្លាយជាគ្រូបង្វឹករបស់ក្លឹបកាំភ្លើងធំ Arsenal នៅថ្ងៃណាមួយរឺទេ? បុរសវ័យ 46 ឆ្នាំ បានបដិសេធមិនឆ្លើយតបលើរឿងនេះ និងបាននិយាយថា គាត់មានការគោរពខ្លាំងណាស់ចំពោះគ្រូបង្វឹកបច្ចុប្បន្នរបស់ក្លឹបកាំភ្លើងធំគឺលោក Mikel Arteta។

Thierry Henry ត្រូវបានគេចាត់ទុកជាវីរបុរសបាល់ទាត់ដ៏អស្ចារ្យមួយ ក្នុងប្រវត្តិសាស្ត្ររបស់ Arsenal ដោយគាត់បានចំណាយពេលជាច្រើននៃអាជីពរបស់ខ្លួនជាមួយក្លឹបអង់គ្លេសមួយនេះ ដោយស៊ុតបញ្ចូលទីបាន 228 គ្រាប់ និង 103 Assists ក្នុងការបង្ហាញខ្លួនសរុប 377 ប្រកួត។

ក្រោយពីព្យួរស្បែកជើងពីបាល់ទាត់ Thierry Henry បានប្រឡូកនៅក្នុងអាជីពជាគ្រូបង្វឹក ហើយបទពិសោធន៍ពីរលើកដំបូងរបស់គាត់ គឺជាជំនួយការគ្រូបង្វឹករបស់ក្រុមជម្រើសជាតិបែលហ្ស៊ិក។ យ៉ាងណានៅរដូវក្ដៅនេះ គាត់ត្រូវបានតែងតាំងឲ្យដឹកនាំក្រុមជម្រើសជាតិបារាំង U21 ហើយគាត់នឹងបន្តដឹកនាំក្រុមយុវជននេះសម្រាប់ការប្រកួតប្រជែងនៅក្នុងព្រឹត្តិការណ៍អូឡាំពិក 2024 ផងដែរ។

អតីតខ្សែប្រយុទ្ធឆ្នើមរូបនេះក៏ធ្លាប់ធ្វើជាគ្រូបង្វឹកដឹកនាំក្លឹបនៅ Ligue 1 គឺ Monaco និងក្លឹប Montreal Impact នៅ MLS ផងដែរ។ ថ្មីៗនេះ Thierry Henry ត្រូវបានគេសួរនៅក្នុងបទសម្ភាសន៍មួយថា តើគាត់នឹងមានក្ដីប្រាថ្នាទៅដឹកនាំ Arsenal ដែលជាអតីតក្លឹបរបស់ខ្លួនដែរទេ? Thierry Henry អះអាងថា គាត់នឹងព្យាយាមបំភ្លេចក្ដីស្រមៃនេះ ដោយនិយាយបន្ថែមថា៖ “ខ្ញុំមានការគោរពចំពោះ Mikel Arteta។ គាត់ធ្វើបានល្អណាស់ក្នុងរយៈពេលពីរឆ្នាំចុងក្រោយនេះ។ ខ្ញុំបានដឹងនៅពេលគេនិយាយអំពីតំណែងជាគ្រូបង្វឹករបស់ Arsenal… យ៉ាងណាខ្ញុំមានការគោរពខ្លាំងណាស់ ចំពោះស្ថានភាពក្លឹបនៅពេលនេះ”។