Ibrahima Konate និយាយ​ពី​ពាក្យ​ចចាម​អារ៉ាម​ដែល​ថា គាត់​ចង់​ចាកចេញ​ទៅ​ចូលរួម​ជាមួយ PSG

កន្លង​មក​ក្លឹប PSG ត្រូវ​បាន​គេដឹង​ថា ចង់​ចុះ​ហត្ថលេខា​នាំ​យក Ibrahima Konate ទៅ​ទឹកដី​បារាំង​ដែល​ជា​ស្រុក​កំណើត​របស់​គេ​វិញ។ ទន្ទឹម​នឹង​នេះ​ដែរ Konate បាន​សារភាព​ថា គាត់​ពិត​ជា​មាន​បំណង​ចង់​ត្រឡប់​ទៅ​លេង​នៅ​លីគ​កំពូល​របស់​បារាំង ប៉ុន្តែ​វា​មិន​មែន​ជា​អ្វី​ដែល​គាត់​ត្រូវ​គិត​នៅ​ពេល​នេះ​ទេ។

បន្ទាប់​ពី​ចប់​ការ​ប្រកួត​កាល​ពី​ម្សិលមិញ​ទល់​នឹង​ក្លឹប Luton Town កីឡាករ​វ័យ 24 ឆ្នាំ​រូប​នេះ ត្រូវ​បាន​គេ​សួរ​ថា តើ​គាត់​ធ្លាប់​ស្រមៃ​ចង់​ក្លាយ​ជា​កីឡាករ​របស់ PSG ដែរ រឺ​ទេ។ គាត់​បាន​ឆ្លើយ​តប​ក្នុង​បទ​សម្ភាសន៍​ជាមួយ Canal Plus ថា៖ “ប្រសិន​បើ​ខ្ញុំ​ឆ្លើយ​ថា​ទេ នោះ​ជា​ចម្លើយ​ដែល​ខ្ញុំ​​កុហក ប៉ុន្តែ​ប្រសិន​បើ​អ្នក​សួរ​ថា តើ​វា​ជា​គោល​បំណង​មួយ​របស់​ខ្ញុំ រឺ​ទេ? វា​មិន​ស្ថិត​ក្នុង​​បំណង​របស់​ខ្ញុំ​ឡើយ”។

គួរ​រំលឹក​ផង​ដែរ​ថា គិត​ចាប់​តាំង​ពី​បាន​មក​ដល់​ក្លឹប​ហង្សក្រហម ក្នុង​ឆ្នាំ 2021 ខ្សែការពារ​កណ្ដាល​រូប​នេះ បាន​ដើរ​តួយ៉ាង​សំខាន់​សម្រាប់​ក្រុម​របស់​លោក Jurgen Klopp ដោយ​បាន​បង្ហាញ​ខ្លួន​សរុប​ចំនួន 64 ប្រកួត។ នៅ​រដូវកាល​ថ្មី​នេះ Konate នៅ​តែ​ជា​ខ្សែការពារ​កណ្ដាល​ដ៏​សំខាន់​របស់ Liverpool ដែល​ចាប់​ដៃ​គូ​គ្នា​បាន​យ៉ាង​ល្អ​ជាមួយ Virgil van Dijk។

ប្រភព: GOAL