គ្រូ​បង្វឹក​ក្រុម​ជម្រើស​ជាតិ​អង់គ្លេស ប្រាប់​មូលហេតុ​ដែល​មិន​កោះ​ហៅ Ben White

គ្រូបង្វឹក​ក្រុម​ជម្រើស​ជាតិ​អង់គ្លេស​លោក Gareth Southgate ថ្មីៗ​នេះ បាន​ច្រានចោល​នូវ​ការ​អះអាង​ក្រៅ​ផ្លូវការណ៍​មួយ​ដោយ​ចោទ​ប្រកាន់​ថា Ben White មិន​ជាប់​ឈ្មោះ​ក្នុង​ក្រុម​​ជម្រើស​ជាតិ​ដោយ​សារ​តែ​មាន​ទំនាក់​ទំនង​មិន​ល្អ​ជាមួយ​គ្រូ​បង្វឹក ដែល​ការ​លើក​ឡើង​នេះ​បាន​កើត​ឡើង​បន្ទាប់​ពី​ខ្សែការពារ​របស់​ក្លឹប​កាំភ្លើងធំ Arsenal រូប​នេះ​មិន​ត្រូវ​បាន​កោះហៅ​ឲ្យ​ចូលក្រុម​ជម្រើស​ជាតិ​អង់គ្លេស។

យ៉ាង​ណា​មិញ កីឡាករ​វ័យ 26 ឆ្នាំ​រូប​នេះ បាន​បង្ហាញ​សមត្ថភាព​គួរ​ឲ្យ​ចាប់​អារម្មណ៍​យ៉ាង​ខ្លាំង សម្រាប់​ក្លឹប​កាំភ្លើងធំ ជា​ពិសេស​ចាប់​តាំង​ពី​ដែល​គាត់​ផ្លាស់ប្តូរ​ពី​ការ​លេង​ជា​ខ្សែ​ការពារ​កណ្តាល​ទៅ​ជា​ខ្សែការពារ​ស្តាំ។ ប៉ុន្តែ​ផ្ទុយ​មក​វិញ ចាប់​ពី​ពេល​នោះ​ដូចគ្នា Ben White មិន​ត្រូវ​បាន​គ្រូ​បង្វឹក​ក្រុម​ជម្រើស​ជាតិ​អង់គ្លេស​ចាប់​អារម្មណ៍​ឡើយ ដោយ​គាត់​មិន​ត្រូវ​បាន​បញ្ចូល​ឈ្មោះ​ក្នុង​ក្រុម​​ឡើយ ជាពិសេស​ចាប់​តាំង​ពី​ព្រឹត្តិការណ៍ World Cup កាលពីឆ្នាំមុន​មក។

ពេល​នេះ Ben White ត្រូវ​បាន​ជម្រុះ​ឈ្មោះ​ចេញ​ពី​ក្រុម​តោ​កំណាច​អង់គ្លេស​ជា​ថ្មី​ម្ដង​ទៀត ហើយ​លោក Gareth Southgate បាន​អះអាង​ថា ការ​មិន​កោះហៅ​ខ្សែការពារ​រូប​នេះ គឺ​ជា​ហេតុផល​បាល់ទាត់​សុទ្ធសាធ ដែល​វា​មិន​មែន​ជា​រឿង​ផ្ទាល់​ខ្លួន​ណា​មួយ​ឡើយ។ គ្រូ​បង្វឹក​រូប​នេះ​បាន​និយាយថា Ben White អាច​ជាប់​ជម្រើស​ជាតិ​លុះ​ត្រា​តែ​គាត់​លេង​បាន​ល្អ ក្នុង​នាម​ជា​ខ្សែការពារ​កណ្ដាល មិន​មែន​ជា​ខ្សែការពារ​ស្ដាំ​ដូច​គាត់​លេង​នៅ​ក្លឹប​ឡើយ។ ជា​ពិសេស​ក្រុម​ជម្រើស​ជាតិ​អង់គ្លេស​មាន​ខ្សែការពារ​ស្ដាំ​ល្អៗ​ជា​ច្រើន​រួច​ហើយ​ដូច​ជា Kyle Walker, Kieran Trippier, Trent Alexander-Arnold និង Reece James ជា​ដើម។

ប្រភព: Metro UK