Inter Milan ត្រៀម​ឆក់​យក Mehdi Taremi ដែល​ក្លឹប​បិសាចក្រហម​កំពុង​ចង់​បាន

ក្លឹប Inter Milan ត្រូវ​បាន​គេរាយការណ៍​ថា កំពុង​ត្រៀម​ប្រកួត​ប្រជែង​ដើម្បី​ចុះ​ហត្ថលេខា​លើ​ខ្សែប្រយុទ្ធ​មួយ​រូប ដែល​ជា​​គោលដៅ​នៃ​ការ​ចង់​បាន​របស់​ក្លឹប​បិសាចក្រហម Manchester United ផង​ដែរ​គឺ​កីឡាករ Mehdi Taremi។ ខ្សែប្រយុទ្ធ​វ័យ 31 ឆ្នាំ​រូប​នេះ គឺ​ជា​កីឡាករ​ដែល​មាន​ឈាម​ជ័រ​នៃ​តំបន់​អាស៊ី​របស់​យើង និង​កំពុង​ប្រកប​អាជីព​ជា​មួយ​ក្លឹប Porto។

យ៉ាង​ណា​មិញ កីឡាករ​ចាស់​វស្សា​របស់​ក្លឹប FC Porto រូប​នេះ កំពុង​ត្រូវ​បាន​គេ​ផ្សារ​ភ្ជាប់​ជា​មួយ​នឹង​ការ​ផ្ទេរ​ទៅ Old Trafford ក្នុង​ខែ​មករា ដើម​ឆ្នាំ​ក្រោយ សម្រាប់​ការ​បំពេញ​នូវ​ចំណុច​ខ្វះខាត​ក្នុង​តំបន់​ប្រយុទ្ធ​កណ្ដាល​របស់​ក្លឹប​បិសាចក្រហម Manchester United។

រដូវកាល​នេះ បិសាចក្រហម​ទើប​តែ​ស៊ុត​បញ្ចូលទី​បាន 13 គ្រាប់​ប៉ុណ្ណោះ​ក្នុង​ការ​ប្រកួត​បើក​ឆាក Premier League ចំនួន 12 លើក​របស់​ពួក​គេ ដោយ​កីឡាករ​ចំណូល​ថ្មី Rasmus Hojlund មិន​ទាន់​រក​បាន​មួយ​គ្រាន់​នៅ​ឡើយ​ទេ​ក្នុង​លីគ ខណៈ​ដែល Marcus Rashford រក​បាន​ត្រឹមតែ 1 គ្រាប់​ប៉ុណ្ណោះ ចាប់​តាំង​ពី​បើក​រដូវកាល​មក។

ដោយ​ឡែក​ពួក​គេ​កំពុង​សម្លឹង​មើល​ឃើញ​ថា Mehdi Taremi នឹង​អាច​មក​បំពេញ​ចំណុច​ខ្វះខាត​នេះ​បាន ស្រប​ពេល​ដែល​កីឡាករ​សញ្ជាតិ​អ៊ីរ៉ង់​រូប​នេះ នឹង​ផុត​កុងត្រា​ជាមួយ​ក្លឹប​បច្ចុប្បន្ន​របស់​គាត់​នៅ​ចុង​បញ្ចប់​នៃ​រដូវកាល​នេះ​ហើយ។ ទោះ​បី​ជា​យ៉ាង​ណា​ក៏​ដោយ​របាយការណ៍​ពី Fichajes បាន​អះអាង​ថា ក្លឹប FC Porto នៅ​តែ​ដាក់​តម្លៃ​លក់​កីឡាករ​រូប​នេះ 20 លានអឺរ៉ូ ទៅ 25 លានអឺរ៉ូ។

មិន​ទាន់​មាន​ការ​ដាក់​សំណើរ​ជា​ផ្លូវការណ៍​ណា​មួយ​មកកាន់ Porto នោះ​ទេ ប៉ុន្តែ​គេ​ជឿ​ថា Inter Milan ជា​បេក្ខភាព​ដែល​មាន​ឱកាស​ខ្ពស់​ក្នុង​ការ​នាំ​យក Mehdi Taremi នៅ​ខែ​មករា​ខាង​មុខ​នេះ។ Inter Milan អាច​នឹង​ប្រញាប់​ប្រញាល់​ក្នុង​ការ​ដេញ​ថ្លៃមុន​ពេល​ខ្សែប្រយុទ្ធ​រូប​នេះ​ផុត​កុងត្រា តែ​ពួក​គេ​ក៏​កំពុង​​ពិចារណា​ដែរ​ថា ពួក​គេ​មាន Lautaro Martinez និង Marcus Thuram រួចហើយ នៅ​ក្នុង​តំបន់​ប្រយុទ្ធ។

ប្រភព: Sportsmole