ក្លឹប​ធំៗ 3 កំពុង​ចាប់​អារម្មណ៍​ចង់​បាន Marcus Rashford

ខ្សែប្រយុទ្ធ Marcus Rashford របស់​ក្លឹប​បិសាចក្រហម Manchester United ត្រូវ​បាន​គេ​រាយ​ការណ៍​ថា បាន​ទាក់ទាញ​ចំណាប់​អារម្មណ៍​ពី​ក្លឹបធំៗ​មួយ​ចំនួន​ដូច​ជា Barcelona, Paris Saint-Germain និង Juventus។ យ៉ាង​ណា​មិញ Rashford ត្រូវ​បាន​ផ្សារ​ភ្ជាប់​ជាមួយ​នឹង​ការ​ចាកចេញ​ពី Old Trafford តាំង​ពី​រដូវកាល​ឆ្នាំ 2021-2022 ដែល​ស្ថិត​ក្រោម​ការ​ដឹកនាំរបស់​អតីត​គ្រូបង្វឹក Ole Gunnar Solskjaer និង Ralf Rangnick ម្ល៉េះ។

ទោះជា​យ៉ាង​ណា​ក៏​ដោយ ក្រោយ​មក​ទៀត​កីឡាករ​សញ្ជាតិ​អង់គ្លេស​រូបនេះ​ត្រូវ​បាន​បញ្ចុះបញ្ចូល​ឲ្យ​បន្ត​នៅ​ក្លឹប​បច្ចុប្បន្ន​របស់​ខ្លួន​បន្ត​ទៀត​ដោយ​លោក Erik ten Hag។ ក្រោម​ការ​ដឹកនាំ​ដំបូង​របស់ Erik ten Hag នៅ Old Trafford កីឡាករ​វ័យ 26 ឆ្នាំ​រូប​នេះបាន​ស៊ុត​បញ្ចូលទី​រហូត​ដល់ 30 គ្រាប់ និង Assists 11 ដង ក្នុង​ការ​បង្ហាញ​ខ្លួន 56 ប្រកួត និង​បាន​ជួយ​បិសាចក្រហម​ឲ្យ​ឈ្នះពាន​រង្វាន់ EFL Cup ផង​ដែរ។

យ៉ាង​ណា Rashford មាន​កុងត្រា​ជាមួយ​ក្លឹប​ម្ចាស់​ជើង​ឯក​របស់​អង់គ្លេស 20 សម័យ​កាល​រហូត​ដល់​ឆ្នាំ 2028 ប៉ុន្តែ​ពេល​នេះ​ទម្រង់​លេង និង​ឱកាស​បង្ហាញ​សមត្ថភាព​របស់​គាត់​នៅ​លើ​ទីលាន​ពិត​ជា​ធ្លាក់​ចុះ​ជា​ខ្លាំង។ កីឡាករ​ដែល​ជា​ម្ចាស់​អាវ​លេខ 10 របស់ Man United រូប​នេះ ស៊ុត​បញ្ចូលទី​បាន​តែ 2 គ្រាប់​ប៉ុណ្ណោះ គិត​ចាប់​តាំង​ពី​បើក​រដូវកាល​ដល់​ពេល​នេះ។

របាយការណ៍​ថ្មីៗ​នេះ​បាន​អះអាង​ថា Rashford ស្ថិត​ក្នុង​ចំណោម​កីឡាករ​មួយ​ចំនួន​នៅ Man United ដែល​បាន​បាត់បង់​ជំនឿ​ចិត្ត​លើ​គ្រូ​បង្វឹក​របស់​ខ្លួន ហើយ​គាត់​ពិត​ជា​មិន​ចង់​លេង​ក្រោម​ការ​ដឹកនាំ​របស់​គ្រូ​បង្វឹក​រូប​នេះ​បន្ត​ទៀត​ឡើយ។ របាយការណ៍​ពី Fichajes បាន​អះអាង​ថា Barcelona, PSG និង Juventus សុទ្ធ​តែ​ចង់​បាន​កីឡាករ​សញ្ជាតិ​អង់គ្លេស​រូប​នេះ។

ប្រភព: Sportsmole