Tottenham Hotspur កំពុង​ពិភាក្សា​ជាមួយ​អ្នក​តំណាង​របស់ Jean-Clair Todibo

ក្លឹប​មាន់ខ្នាយមាស Tottenham Hotspur ត្រូវ​បាន​គេ​រាយការណ៍​ថា បាន​ពិភាក្សា​ជា​ថ្មី​ម្ដង​​ទៀត​លើ​កិច្ចព្រមព្រៀង ដើម្បី​ឈាន​ដល់​ការ​ចុះ​ហត្ថលេខា​លើ​ខ្សែការពារ Jean-Clair Todibo របស់​ក្លឹប Nice។ កីឡាករ​វ័យ 23 ឆ្នាំ​រូប​នេះ ត្រូវ​បាន​ផ្សារ​ភ្ជាប់​យ៉ាង​ខ្លាំង​ជាមួយ​នឹង​ការ​ផ្លាស់​ទៅ​កាន់​ទឹកដី Premier League ក្នុង​រយៈពេល​ប៉ុន្មាន​ខែ​ចុងក្រោយ​នេះ ដោយ​ក្លឹប Nice ក៏​ចង់​ចែក​ផ្លូវ​ជាមួយ​ខ្សែការពារ​កណ្តាល​រូប​នេះ​ផង​ដែរ​នៅ​ឆ្នាំ 2024។

មាន់ខ្នាយមាស Tottenham Hotspur ត្រូវ​បាន​គេ​ជឿ​ថា ជា​ក្លឹប​ក្នុង​ក្រប​ខ័ណ្ឌ​កំពូល​របស់​អង់គ្លេស​ចុង​ក្រោយ​គេ​ដែល​ចង់​បាន Jean-Clair Todibo ខណៈ​ដែល​ Manchester United, Liverpool និង Chelsea កំពុង​តាមដាន​ពី​ទម្រង់​លេង​របស់​កីឡាករ​​សញ្ជាតិ​​បារាំង​រូប​នេះ តាំង​ពី​ដើម​រដូវកាល​មក​ម្ល៉េះ។

មាន់ខ្នាយមាស បាន​ចាប់​ផ្ដើម​ស្វែងរក​បេក្ខភាព​ខ្សែការពារ​ចំណូល​ថ្មី​បន្ទាប់​ពី Micky van de Ven មាន​របួស​សរសៃពួរ ស្រប​ពេល​ដែល​ជម្រើស​បច្ចុប្បន្ន​សម្រាប់​លោក Postecoglou មាន​ខ្សែការពារ Cristian Romero, Eric Dier និង Ashley Phillips។ ទោះ​ជា​យ៉ាង​ណា សម្រាប់​ខ្សែការពារ​ដែល​តែងតែ​ស្ថិត​ក្នុង​ការ​ពេញ​ចិត្ត​របស់​ក្រុម​មាន​តែ Cristian Romero ម្នាក់​ប៉ុណ្ណោះ ដោយ​កីឡាករ​សញ្ជាតិ​អាហ្សង់ទីន​រូប​នេះ​នៅ​តែ​មាន​ទម្រង់​លេង​ដ៏​លេច​ធ្លោរ។

យោងតាម​កាសែត Daily Mail បាន​ឲ្យ​ដឹង​ថា ថ្មីៗ​នេះ​អ្នក​តំណាង​របស់ Todibo បាន​ពិភាក្សា​បន្ថែម​ទៀត​ជាមួយ Tottenham Hotspur កាល​ពី​សប្តាហ៍​មុន ដើម្បី​កំណត់​តម្លៃ​ផ្ទេរ​ខ្សែ​ការពារ​រូប​នេះ ដែល​អាច​ចាយ​លុយ​ត្រឹមតែ 35 លានផោន។ ដូចគ្នា​នេះ​ដែរ គេ​ដឹង​ថា Todibo មាន​បំណង​ចង់​ចូលរួម​ជាមួយ​ក្រុម​របស់​លោក Postecoglou ដែល​កំពុង​មាន​ទម្រង់​លេង​ដ៏​លេច​ធ្លោរ​ផង​ដែរ។

ប្រភព: Sportsmole