Thomas Muller បន្ត​កុងត្រា​ថ្មី​ជាមួយ Bayern Munich

កីឡាករ​ដែល​មាន​បទពិសោធន៍​ចាស់​ទុំ​ជាង​គេ​ក្នុង​ប្រវត្តិសាស្ត្រ​លីគ​កំពូល​អាឡឺម៉ង់ និង​ជា​កីឡាករ​របស់​ក្លឹប Bayern Munich គឺ​ខ្សែបម្រើ​ប្រយុទ្ធ Thomas Muller បាន​បន្ត​កុងត្រា​ជាមួយ​ក្លឹប​បច្ចុប្បន្ន​របស់​ខ្លួន​ថែម​មួយ​ឆ្នាំ​ទៀត (នេះ​បើ​យោងតាម​គេហទំព័រ​ផ្លូវការណ៍​របស់ Bayern Munich បាន​ចុះ​ផ្សាយ)។

កិច្ច​ព្រមព្រៀង​កុងត្រា​ថ្មី​របស់​ខ្សែ​ប្រយុទ្ធ​វ័យ 34 ឆ្នាំ​រូប​នេះ ត្រូវ​បាន​រៀបចំ​ឡើង​ដោយ​មាន​សុពលភាព​រហូត​ដល់​ដំណាច់ ខែ​មិថុនា ឆ្នាំ 2025 ខណៈ​ដែល​កុងត្រា​ពី​មុន​របស់​គាត់ នឹង​ផុត​កំណត់​នៅ​រដូវក្តៅ​ឆ្នាំ 2024 (ចុង​បញ្ចប់​រដូវកាល​នេះ)។ គួរ​កត់​សម្គាល់​ផង​ដែរ​ថា Muller គឺ​ជា​កីឡាករ​ដែល​ប្រសូត្រ​ចេញ​ពី​ថ្នាល​យុវជន​របស់ Bayern Munich នេះ​ផ្ទាល់តែ​ម្ដង និង​មិន​ដែល​ផ្ទេរ​ទៅ​លេង​នៅ​ក្លឹប​ណា​ផ្សេង​ឡើយ។

គាត់​ធ្លាប់​បាន​ឈ្នះ​ពាន Bundesliga ចំនួន 12 ដង ជាមួយ​ក្លឹប​របស់​ខ្លួន​ដែល​ពាន​ទាំង​នោះ​មាន​ដូច​ជា ពាន​លីគ​កំពូល, German Cup និង UEFA Champions League ជា​ដើម។ នៅ​ក្នុង​រដូវកាល 2023/2024 នេះ Muller បង្ហាញ​ខ្លួន​ក្នុង​ការ​ប្រកួត Bundesliga ចំនួន 12 ដង ដោយ​បាន​រួម​ចំណែក​ស៊ុត​បញ្ចូលទី​បាន 1 គ្រាប់ និង Assists 4 ដង និង​នៅ UEFA Champions League ចំនួន 5 ដង រួម​ចំណែក​ស៊ុត​បញ្ចូលទី​បាន Assist ម្ដង។

ប្រភព: Telecomasia