Atalanta ដាក់​តម្លៃ​ខ្លួន​ច្រើន​ជាង 50 លានផោន សម្រាប់​ខ្សែការពារ​មួយ​រូប​ដែល Man United ចង់​បាន

ក្លឹប Atalanta បាន​កំណត់​តម្លៃ​ខ្លួន 51.7 លានផោន សម្រាប់​ក្លឹប​បិសាចក្រហម Manchester United ដែល​កំពុង​ចង់​ចុះ​ហត្ថលេខា​លើ​កីឡាករ​របស់​ពួក​គេ​គឺ​ខ្សែការពារ Giorgio Scalvini។ យោង​តាម​របាយការណ៍​ពី SportItalia បាន​ឲ្យ​ដឹង​ថា Man United គឺ​ជា​ក្លឹប​ចុងក្រោយ​គេ​ក្នុង​ចំណោម​ក្លឹប​ជា​ច្រើន​ទៀត​ដែល​ចាប់​អារម្មណ៍​លើ Scalvini។

គេ​បាន​ដឹង​ថា ថ្នាក់​លើ​របស់​ក្លឹប​បិសាចក្រហម​បាន​បញ្ជូន​អ្នក​អង្កេត​ការណ៍​របស់​ខ្លួន​ឲ្យ​ទៅ​មើល​ពី​ទម្រង់​លេង​របស់​ខ្សែការពារ​ឆ្នើម​រូប​នេះ​មួយ​រយៈពេល​មក​ហើយ មុន​នឹង​ឈាន​ដល់​ដំណាក់​កាល​នៃ​ការ​ស៊ើបសួរ​តម្លៃ​ខ្លួន​របស់​គេ។ ទោះ​បីជា Scalvini ទើប​តែ​មាន​វ័យ 20 ឆ្នាំ​ពិត​មែន តែ​គាត់​បានបង្ហាញ​ខ្លួន​ជា​មួយ​ក្រុម​​ជម្រើស​ជាតិ​អ៊ីតាលី​ចំនួន 7 ដង​​រួច​ទៅ​ហើយ ​បន្ទាប់​ពី​ឡើង​ជើង​ខ្លាំង​នៅ Atalanta។

កីឡាករ​ជំនាញ​ជើង​ស្ដាំ​រូបនេះ​បាន​បង្ហាញ​ខ្លួន​ជា​លើក​ដំបូង​នៅ​ក្នុង​ក្របខណ្ឌ​កំពូល​របស់​អ៊ីតាលី Serie A នៅ​អាយុ​ត្រឹមតែ 17 ឆ្នាំ​ប៉ុណ្ណោះ ហើយ​គិត​ចាប់​តាំង​ពី​ពេល​នោះ​មក គាត់​លេង​ឲ្យ​ក្លឹប​បច្ចុប្បន្ន​របស់​ខ្លួន​បាន 74 ប្រកួត​មក​ហើយ។

ការ​វិវត្តន៍​ខ្លួន​ដ៏​ល្អ​របស់​គាត់ ក៏​ត្រូវ​បាន​ក្លឹប​ក្នុង​ស្រុក Juventus និង AC Milan ចាប់​អារម្មណ៍​ខ្លាំង​ដែរ។ ទន្ទឹម​នឹងនេះ Man United ត្រៀម​នឹង​ចាយ​លុយ​ធំ​លើ​កីឡាករ​វ័យ​ក្មេង​ដែល​អាច​មាន​ទេពកោលសល្យ​កាន់​តែ​លេចធ្លោរ​នា​ពេល​អនាគត។ បិសាចក្រហម​ចង់​នាំ​យក Scalvini មក​ជំនួស Raphael Varane ដែល​ត្រូវ​បាន​គេ​រំពឹង​ថា អាច​នឹង​ចាកចេញ​ពី Old Trafford នៅចុង​បញ្ចប់​នៃ​រដូវកាល​នេះ។

ប្រភព: Dailypost NG