បាល់ទាត់អន្តរជាតិ
Real Madrid បន្តកុងត្រាថ្មីជាមួយ Eder Militao ដែលមានសុពលភាពដល់ឆ្នាំ 2028
កាលពីម្សិលមិញនេះក្លឹបអធិរាជស Real Madrid បានប្រកាសជាផ្លូវការណ៍អំពីការបន្តកុងត្រាថ្មីជាមួយខ្សែការពារកណ្តាល Eder Militao ដែលមានសុពលភាពរហូតដល់ឆ្នាំ 2028។ កីឡាករសញ្ជាតិប្រេស៊ីលរូបនេះ បានចូលរួមជាមួយ Real Madrid នៅរដូវក្តៅឆ្នាំ 2019 ដោយពេលនោះគាត់បានចុះកិច្ចព្រមព្រៀងដល់ឆ្នាំ 2025។
ថ្វីត្បិតតែ Eder Militao កំពុងមានរបួសសរសៃពួររយៈពេលយូរក៏ដោយ កីឡាករវ័យ 26 ឆ្នាំរូបនេះ នៅតែត្រូវបានការជឿទុកចិត្តលើសមត្ថភាពរបស់គាត់ពីសំណាក់ក្លឹប Real Madrid។ គិតចាប់តាំងពីបានផ្ទេរមកទឹកដីអេស្ប៉ាញ មកទល់នឹងពេលនេះ Eder Militao បានបង្ហាញខ្លួនសរុប 143 ប្រកួត ដោយរួមចំណែកស៊ុតបញ្ចូលទីបាន 11 គ្រាប់។
ផ្សេងពីនេះទៀត Eder Militao ក៏ជាកីឡាករដ៏សំខាន់សម្រាប់ក្រុមជម្រើសជាតិប្រេស៊ីលផងដែរ ដោយគាត់បានជាប់ឈ្មោះនៅក្នុងក្រុមជម្រើសជាតិរបស់ខ្លួនតាំងពីឆ្នាំ 2018 រហូតដល់បច្ចុប្បន្ន។ សម្រាប់តម្លៃខ្លួនបច្ចុប្បន្នរបស់ខ្សែការពារកណ្ដាលរូបនេះ បើផ្អែកតាមគេហទំព័រ Transfermarkt ត្រូវបានប៉ាន់ប្រមាណថា មានចំនួន 70 លានអឺរ៉ូ។
ប្រភព: Telecomasia