បិសាចក្រហម កំពុង​សម្លឹង​មើល​ការ​ផ្ទេរ​ខ្សែ​ប្រយុទ្ធ​មួយ​រូប​ដែល​មាន​តម្លៃ 30 លានផោន

ក្លឹប​បិសាចក្រហម Manchester United ត្រូវ​បាន​គេ​រាយការណ៍​ថា កំពុង​ពិចារណា​លើ​ការ​ផ្ទេរ​មួយ​នា​រដូវក្តៅ​នេះ សម្រាប់​ខ្សែប្រយុទ្ធ​របស់​ក្លឹប Sporting Lisbon គឺ​កីឡាករ Marcus Edwards។ កីឡាករ​វ័យ 25 ឆ្នាំ​រូបនេះ គឺ​ជា​កីឡាករ​ដែល​ប្រសូត្រ​ចេញ​ពី​ថ្នាល​យុវជន​របស់​ក្លឹប Tottenham Hotspur ដោយ​គាត់​បាន​ចូលរួម​ជាមួយ​ក្លឹប​អង់គ្លេស​មួយ​នេះ តាំង​ពី​អាយុ 8 ឆ្នាំ។

ក្រោយ​មក​ទៀត Marcus Edwards បាន​ខ្ចី​ជើង​ទៅ Norwich City និង Excelsior មុន​ពេល​ចាកចេញ​ជា​ផ្លូវការណ៍​ពី​ក្លឹប Tottenham Hotspur នៅ​ក្នុង​ឆ្នាំ 2019 ដើម្បី​ផ្លាស់​ទៅ​លេង​នៅ​លីគ​កំពូល​របស់​ព័រទុយហ្គាល់​ជាមួយ​ក្លឹប Vit. Guimaraes។ ខ្សែប្រយុទ្ធ​រូបនេះ​ស៊ុត​បញ្ចូលទី​បាន 20 គ្រាប់ និង​បញ្ជូនបាល់​ឲ្យ​មិត្ត​រួម​ក្រុម​បាន​ចំនួន 14 ដង ក្នុង​ការ​បង្ហាញ​ខ្លួន 96 ប្រកួត ដែល​ធ្វើ​ឲ្យ Sporting CP ពេញ​ចិត្ត​សមត្ថភាព​របស់​គាត់ ហើយ​ក៏​ចុះហត្ថលេខា​ផ្ទេរ Marcus Edwards ក្នុងរដូវរងារ​ឆ្នាំ 2022។

គិត​មក​ទល់​នឹង​ពេល​នេះ Edwards បាន​បង្ហាញ​ខ្លួន​ចំនួន 93 ប្រកួត សម្រាប់​ក្លឹប Sporting ដោយ​ស៊ុត​បញ្ចូលទី​បាន 21 គ្រាប់ និង​បញ្ជូន​បាល់​ឲ្យ​មិត្ត​រួម​ក្រុម​បាន​ចំនួន 22 ដង។ កាល​ពី​មួយ​រយៈ​មុន Tottenham Hotspur ធ្លាប់​ត្រូវ​បាន​ផ្សារភ្ជាប់​ជាមួ​យ​នឹង​ការ​ផ្ទេរ​អតីត​កីឡាករ​វ័យ​ក្មេង​របស់​ពួកគេ​ត្រឡប់​មក​វិញ ប៉ុន្តែ​បើ​យោងតាម FootballTransfers ថ្មីៗ​នេះ បាន​អះអាង​ថា Man United គឺ​ជា​ក្លឹប​អង់គ្លេស​ដែល​បង្ហាញ​ការ​ចាប់​អារម្មណ៍​ខ្លាំង​បំផុត​លើ Marcus Edwards។ គេ​បាន​ដឹង​ថា Man United អាច​នឹង​ហ៊ាន​ដេញ​ថ្លៃ​ក្នុង​រង្វង់​ទឹកប្រាក់​ប្រហែល 30 លានផោន សម្រាប់​ខ្សែប្រយុទ្ធ​វ័យ​ក្មេង​រូប​នេះ។

ប្រភព: Sportsmole