បាល់ទាត់អន្តរជាតិ
La Liga កំពុងស៊ើបអង្កេតលើករណីរើសអើងពូជសាសន៍លើ Vinicius Jr
សហព័ន្ធនៃក្របខណ្ឌ La Liga របស់អេស្ប៉ាញ កាលពីថ្ងៃចន្ទ បានបង្ហាញឲ្យដឹងថា ពួកគេកំពុងពិនិត្យ និងស៊ើបង្កេតមើលវីដេអូ ដែលបង្ហាញពីសកម្មភាពនៃកុមារម្នាក់ ប្រមាថដោយការរើសអើងជាតិសាសន៍ទៅលើខ្សែប្រយុទ្ធស្លាប Vinicius Junior របស់ក្លឹប Real Madrid ក្នុងអំឡុងពេលនៃការប្រកួតដែលបញ្ចប់ទៅដោយលទ្ធផលស្មើ 2-2 ជាមួយ Valencia កាលពីចុងសប្តាហ៍នេះ។
នៅក្នុងវីដេអូមួយ ដែលត្រូវបានផ្សព្វផ្សាយដោយអ្នកកាសែតរបស់ ESPN Brasil បានបង្ហាញឲ្យឃើញពី ក្មេងប្រុសម្នាក់ដែលអង្គុយនៅលើភ្លៅរបស់ស្ត្រី (អាចជាម្ដាយ) ហើយក្នុងអំឡុងពេលនោះ គេបានលឺក្មេងរូបនោះស្រែកហៅ Vinicius ថាជា “ស្វា”។
យោងតាមសេចក្ដីបញ្ជាក់របស់ La Liga បានឲ្យដឹងថា៖ “យើងកំពុងស្ថិតក្នុងដំណើរការសិក្សា និងវិភាគការពិតតាមទស្សនៈផ្លូវច្បាប់ ដើម្បីមើលថា យើងអាច និងគួរធ្វើយ៉ាងណាទាក់ទងនឹងបញ្ហានេះ”។
Vinicius Jr ក៏បានស៊ុតបញ្ចូលទី 2 គ្រាប់នៅក្នុងប្រកួតទល់នឹង Valencia ផងដែរ ហើយពេលដែលរកបានគ្រាប់បាល់ 1 គ្រាប់ដំបូង គាត់បានអបអរគ្រាប់បាល់ ដោយលើកកណ្តាប់ដៃរបស់ខ្លួនមានន័យថាជា “Black Power” ដែលប្រឆាំងនឹងការរំលោភបំពានពូជសាសន៍។ កីឡាករវ័យ 23 ឆ្នាំរូបនេះ បច្ចុប្បន្នបានក្លាយជានិមិត្តរូបនៃការប្រយុទ្ធប្រឆាំងនឹងការរើសអើងពូជសាសន៍នៅក្នុងប្រទេសអេស្ប៉ាញ បន្ទាប់ពីទទួលរងការរើសអើងជាតិសាសន៍ជាច្រើនលើកច្រើនសារ។
ប្រភព: Thehindu