Ivan Rakitic កោត​សរសើរ​ចំពោះ​សមិទ្ធិផល និង​ការ​ដឹកនាំ​របស់​ក្លឹប Real Madrid ដែល​ល្អ​ប្រសើរ​ជាង Barcelona

អតីត​កីឡាករ​ឆ្នើម​របស់​ក្លឹប​អ្នក​មាន​បុណ្យ Barcelona គឺ​ខ្សែបម្រើ Ivan Rakitic ដែល​បច្ចុប្បន្ន​លេង​ឲ្យ​ក្លឹប​របស់​អារ៉ាប៊ីសាអូឌីត Al-Shabab បាន​ចែករំលែក​ពី​ទស្សនៈ​យល់​ឃើញ​របស់​គាត់​អំពី​របៀប​ដែល​ក្លឹប Real Madrid កែ​លម្អរ​រចនា​សម្ព័ន្ធ និង​ការ​ដឹកនាំ​របស់​ប្រធាន​ក្លឹប​ដែល​គួរ​ឲ្យ​កោត​សរសើរ។

ខ្សែបម្រើ​សញ្ជាតិ​ក្រូអាត​រូប​នេះ​បាន​និយាយ​ថា៖ “វា​ដូចជា​កាល​នៅ​ក្មេង អ្នក​មាន​មិត្ត​ស្រី ហើយ​អ្នក​មិន​សូវ​យក​ចិត្ត​ទុក​ដាក់​ចំពោះ​នាង​ទេ ប៉ុន្តែ​អ្នក​មិន​ដឹង​ឡើយ​រហូត​ដល់​បាត់បង់​នាង។ Real Madrid អាច​ធ្វើអ្វីៗ​គ្រប់​យ៉ាង​បាន​យ៉ាង​ល្អ​បន្តិច​ម្តងៗ ប៉ុន្តែ Barcelona ប្រហែល​ជា​លឿន​ពេក​ហើយ។ ខ្ញុំ​ជឿ​ជាក់​ថា Gavi និង Pedri នឹង​ក្លាយ​ជា​អនាគត​នៃ​កីឡាករ​ឆ្នើម​របស់ Barcelona និង​ក្រុម​ជម្រើសជាតិ​អេស្ប៉ាញ ប៉ុន្តែ​ខ្ញុំគិត​ថា ជំនួយ​របស់​យើង​ក្នុង​នាម​ជា​កីឡាករ​ចាស់​វស្សា នឹង​ល្អ​សម្រាប់​ពួក​គេ”។

Ivan Rakitic បាន​បន្ថែម​ទៀត​ថា៖ “សម្រាប់ Real Madrid វិញ? ពួក​គេ​បាន​ធ្វើ​រឿង​ត្រឹម​ត្រូវ ដើម្បី​កសាង​ក្រុម​ដ៏​រឹង​មាំ​មួយ ក្នុង​រយៈពេល​​ប៉ុន្មាន​ឆ្នាំ។ ខ្ញុំ​និយាយ​ដោយ​ការគោរព​បំផុត ព្រោះ​ពួកគេ​ជា​គូប្រជែង​របស់ខ្ញុំ​ជាច្រើន​ឆ្នាំ​មក​ហើយ ប៉ុន្តែ​ការ​មើល​ឃើញ​នូវ​អ្វី​ដែល​លោក Florentino Perez សម្រេចបាន អ្នក​ត្រូវតែ​ផ្តល់​ការ​កោតសរសើរ​​ទៅ​គាត់។ ពួកគេ​កំពុង​ទទួល​បាន​អ្វី​ដែល​ពួក​គេ​ចង់​បាន។ គម្រោង​​ផែនការ​ច្បាស់លាស់​របស់​ពួក​គេ, ប្រធាន​ក្លឹប​​មិន​តែងតែ​យល់​ឃើញ​​ត្រឹមត្រូវ​រហូត​ទេ ប៉ុន្តែ​គាត់​យល់​​ត្រូវ​ក្នុង​ការ​សម្រេច​ចិត្ត​របស់​គាត់ ជាមួយ​នឹង​កីឡាករ ជាមួយ​នឹង​ក្រុម​ទាំងមូល និង​ជាមួយ​អ្វី​គ្រប់​យ៉ាង​ដែល​នៅ​ជុំវិញ​គាត់។ គាត់​ត្រូវតែ​ទទួល​បាន​ការ​កោត​ស្ញប់ស្ញែង”។

ប្រភព: Dailysports