បាល់ទាត់អន្តរជាតិ
ខ្សែការពារវ័យ 17 ឆ្នាំរបស់ Barcelona ត្រូវបានកោះហៅឲ្យចូលក្រុមជម្រើសជាតិអេស្ប៉ាញជាលើកដំបូង
រដូវកាលនេះ គឺជារដូវកាលដ៏អស្ចារ្យបំផុតមួយសម្រាប់ខ្សែការពារ Pau Cubarsi។ មិនត្រឹមតែបានបង្ហាញខ្លួនដ៏លេចធ្លោរជាមួយនឹងក្រុមឈុតធំរបស់ក្លឹបបច្ចុប្បន្ន FC Barcelona ប៉ុណ្ណោះទេ តែខ្សែការពារកណ្ដាលវ័យក្មេងរូបនេះ ត្រូវបានកោះហៅឲ្យចូលក្រុមជម្រើសជាតិអេស្ប៉ាញជាលើកដំបូងទៀតផង។
ខ្សែការពារដែលកំពុងឡើងជើងខ្លាំង Pau Cubarsi ទើបនឹងបង្ហាញខ្លួនយ៉ាងលេចធ្លោរក្នុងការប្រកួតជើងទី 2 ប៉ះជាមួយ Napoli និងបានក្លាយជាចំណែកដ៏សំខាន់ក្នុងការជួយ Barcelona ឲ្យឡើងទៅកាន់វគ្គ 8 ក្រុមចុងក្រោយ។ ដោយឡែកក្នុងចំណោមកីឡាករទាំង 26 នាក់ដែលគ្រូបង្វឹកក្រុមជម្រើសជាតិអេស្ប៉ាញលោក Luis de la Fuente បានកោះហៅនោះមានកីឡាកររបស់ Barcelona តែ 2 នាក់ប៉ុណ្ណោះគឺ Pau Cubarsi និង Lamine Yamal។
យ៉ាងណាមិញ ក្រុមជម្រើសជាតិអេស្ប៉ាញនឹងត្រូវប្រកួតមិត្តភាពចំនួន 2 លើកនាពេលខាងមុខ ដែលត្រូវប៉ះជាមួយនឹងក្រុមជម្រើសជាតិកូឡុំប៊ី និងប្រេស៊ីល។ លើកទី 1 ដែលប៉ះនឹងកូឡុំប៊ី គឺធ្វើឡើងនៅថ្ងៃទី 23 ខែមីនា ក្នុងកីឡដ្ឋាន London និងលើកទី 2 ត្រូវជួបនឹងប្រេស៊ីល ធ្វើឡើងនៅថ្ងៃទី 27 ខែមីនា ហើយការប្រកួតត្រូវលេងនៅកីឡដ្ឋាន Santiago Bernabeu របស់ Real Madrid។
ប្រភព: Dailysports