Dortmund បំបែក​កំណត់ត្រា​រយៈពេល 7 ឆ្នាំ ដែល​មិន​ធ្លាប់​ឈ្នះ Bayern Munich ក្រៅ​ដី!!!

កាល​ពី​រំលង​អាធ្រាត​យប់​មិញ​នេះ ជា​ការ​ប្រកួត​ជុំ​ទី 27 នៃ​ក្របខ័ណ្ឌ Bundesliga រវាង​ក្លឹប Bayern Munich និង​ក្រុម​ភ្ញៀវ Borussia Dortmund។ ជា​លទ្ធផល​ចុង​ក្រោយ បាន​បញ្ចប់​ទៅ​ដោយ​ក្រុម​ម្ចាស់​ផ្ទះ​បាន​ចាញ់ 2-0។ ជាមួយ​គ្នា​នឹង​លទ្ធផល​នេះ​ដែរ បាន​ធ្វើ​ឲ្យ Bayern Munich កាន់​តែ​ឃ្លាត​ឆ្ងាយ​ឱកាស​ក្នុង​ការ​ប្រជែងពាន​លីគ​នៅ​រដូវកាល​នេះ។

ផ្សេង​ពី​នេះ​ទៀត ការ​លុត Bayern Munich នៅ​ក្រៅ​ដី​បែប​នេះ បាន​ធ្វើ​ឲ្យ Borussia Dortmund បំបែក​កំណត់ត្រា​រយៈពេល 7 ឆ្នាំ​ចុង​ក្រោយ ដែល​ពួក​គេ​មិន​ធ្លាប់​ឈ្នះ​សោះ​ពេល​លេង​ក្នុង​ទឹកដី Allianz Arena។ ក្លឹប Borussia Dortmund កំពុង​ព្យាយាម​ដណ្ដើម​ចំណាត់​ថ្នាក់ Top-4 មុន​រដូវកាល​នេះ​បិទ​បញ្ចប់ ដើម្បី​ទទួល​បាន​កៅអី​លេង​នៅ UEFA Champions League ឆ្នាំ​ក្រោយ។

គ្រាប់​បាល់ 2 គ្រាប់​របស់​ក្លឹប Borussia Dortmund ជា​ការ​ស៊ុត​បញ្ចូលទី​ពី Karim Adeyemi តាំង​ពី​នាទីទី 10 ដែល​ជា​ការ​បញ្ជូន​បាល់​ដ៏​ល្អ​ពី​សំណាក់ Julian Brandt។ ទោះ​បី​ជា​មាន​ឱកាស​ល្អៗ​ជា​ច្រើន​ក៏​ដោយ Bayern Munich មិន​អាច​រក​គ្រាប់​បាល់​តាម​ស្មើ​ឡើយ ហើយ​ជា​ចុង​ក្រោយ​ដល់​នាទីទី 83 ខ្សែការពារ Julian Ryerson របស់ Dortmund ក៏​បាន​ដាក់​ថែម 1 គ្រាប់​ទៀត​ចុង​ក្រោយ។

ប្រភព: Dailysports