លុយ​មិន​សំខាន់​ទេ!!! Cristiano Ronaldo បដិសេធ​ភ្លាមៗ​ជាមួយ​នឹងសំណើរ​ផ្ទេរ​ទៅ​កាន់​ក្លឹប​របស់​អារ៉ាប៊ីសាអូឌីត

នៅ​ដើម​សប្ដាហ៍​នេះ មាន​ក្លឹប​មួយ​ដែល​ស្ថិត​នៅ​លីគកំពូល​របស់​អារ៉ាប៊ីសាអូឌីត បាន​ចាប់​អារម្មណ៍​នឹង​តារា​ឆ្នើម Cristiano Ronaldo ហើយ​ពួក​គេ​អាច​ផ្ដល់​តម្លៃ​ផ្ទេរ​ដ៏​ច្រើន​គឺ 275 លានអឺរ៉ូ ប្រសិន​បើ​គាត់​ព្រម​ផ្ទេរ​ទៅ​ចូល​រួម​ជាមួយ​ពួក​គេ។

ទោះ​ជា​យ៉ាង​ណា សំណើរ​របស់​ក្លឹប​អារ៉ាប៊ីសាអូឌីត ដែល​មិន​ត្រូវ​បាន​គេ​ប្រាប់​អត្តសញ្ញាណ​ច្បាស់លាស់​នោះ ត្រូវ​ច្រាន​ចោល​ភ្លាមៗ​ពី Cristiano Ronaldo។

យ៉ាង​ណា​មិញ លុយ​ប្រហែល​មិន​មែន​ជា​គោល​បំណង​ពិត​ប្រាកដ​របស់​ខ្សែ​ប្រយុទ្ធ​ឆ្នើម​រូប​នេះ​ទេ អ្វី​ដែល​គាត់​ចង់​បាន គឺ​ការ​លេង​នៅ​ក្នុង​លីគ​ដែល​មាន​ការ​ប្រកួត​ប្រជែង​ខ្ពស់ ពិសេស​គឺ​ក្លឹប​ដែល​អាច​មាន​ឱកាស​លេង​ពាន UEFA Champions League។ ម្ចាស់​ពាន Ballon d’Or ប្រាំ​សម័យ​កាល​រូប​នេះ នៅ​តែ​ចិញ្ចឹម​ចិត្ត​ចង់​លេង​បាល់ទាត់​បន្ត​ទៀត ទោះ​បី​ជា​គាត់​មាន​វ័យ 37 ឆ្នាំ​ហើយ​ក៏ដោយ។

Cristiano Ronaldo នៅ​តែ​មិន​ទាន់​មាន​ភាព​ច្បាស់​លាស់​ជា​មួយ​នឹង​ក្លឹប​បច្ចុប្បន្ន​របស់​គាត់ Manchester United ខណៈ​ដែល​គ្រូ​បង្វឹក​ថ្មី​លោក Erik ten Hag បញ្ជាក់​ថា ខ្សែប្រយុទ្ធ​កណ្ដាល​រូប​នេះ នឹង​ស្ថិត​ក្នុង​គម្រោង​របស់​គាត់​នៅ​រដូវកាល​ក្រោយ។

យោងតាម​របាយការណ៍​របស់ ESPN បាន​ឲ្យ​ដឹង​ថា ក្លឹប​មក​ពី​អារ៉ាប៊ីសាអូឌីត​នេះ ជា​ក្លឹប​ចុងក្រោយ​បំផុត​ដែល​ចង់​បាន Ronaldo ហើយ​ពួក​គេ​ហ៊ាន​ចំណាយ​ប្រាក់​ផ្ទេរ​រហូត​ដល់ 275 លានអឺរ៉ូ។ ពួក​គេ​ក៏​​នឹង​ផ្ដល់​ទឹកប្រាក់ 30 លានអឺរ៉ូ សម្រាប់​សេវាកម្ម​នៃ​ការ​​ដេញ​ថ្លៃ​លើ Cristiano Ronaldo ថែម​ទៀត​ផង។

ប្រភព: 90 Min