អតីត​គ្រូបង្វឹក​​ក្រុម​ជម្រើស​ជាតិ​អេស្ប៉ាញ​ប្រាប់​ឈ្មោះ​កីឡាករ​ដែល​គាត់​គិត​ថា​ល្អ​បំផុត​រវាង Ronaldo, Messi និង Neymar

តារា​ឆ្នើម Lionel Messi និង Cristiano Ronaldo នៅ​តែ​ធ្វើ​ឲ្យ​ការ​ជជែក​វែកញែក​ដេញ​ដោល​គ្នា​មិន​ចេះ​ចប់​មិន​ចេះ​ហើយ។ ជា​ច្រើន​ឆ្នាំ​មក​នេះ មនុស្ស​ជា​ច្រើន រួម​ទាំង​កីឡាករ​បាល់ទាត់​អាជីព​ក៏​បាន​និយាយ​ពី​ការ​ជ្រើស​រើស​អ្នក​ណា​ល្អ​ជាង​រវាង​អ្នក​ទាំង​ពីរ​ផង​ដែរ ហើយ​អតីត​គ្រូបង្វឹក​ក្រុម​ជម្រើស​ជាតិ​​អេស្ប៉ាញ​ដែល​ធ្លាប់​ឈ្នះពាន World Cup លោក Vicente del Bosque ក៏​បាន​លើក​ឡើង​ពី​គំនិត​នៃ​ការ​យល់​ឃើញ​របស់​គាត់​ផង​ដែរ។

ថ្វី​បើ​​លោក Vicente del Bosque ធ្លាប់​ជា​គ្រូ​បង្វឹក និង​ដឹកនាំ Real Madrid ឲ្យ​ឈ្នះ​ពានរង្វាន់ UEFA Champions League ពីរ​លើក​ក៏​ដោយ ក៏​បុរស​ញ្ជាតិ​អេស្ប៉ាញ​រូបនេះ​បាន​ច្រានចោល​ការ​ជ្រើស​រើសយក Cristiano Ronaldo ខណៈ​ដែល​គាត់​បាន​ប្រកាស​ថា Lionel Messi ជា​កីឡាករ​ល្អ​បំផុត​នៅ​ក្នុង​ពិភពលោក។

នៅ​ពេល​ត្រូវ​បាន​គេ​សួរ​ឲ្យ​ជ្រើសរើស​រវាង Messi, Ronaldo និង Neymar ពេល​នោះ​លោក Vicente del Bosque បាន​និយាយ​ថា៖ “ក្នុង​នាម​ខ្ញុំ​ធ្លាប់​ជាកីឡាករ ខ្ញុំ​គិត​ថា Messi គឺ​ជា​កីឡាករ​ល្អបំផុត។ ខ្ញុំ​មាន​អារម្មណ៍​មិន​ល្អ​ដែល​និយាយ​បែប​នេះ ព្រោះ​មិន​ចង់​រំខាន​ដល់​នរណា​ម្នាក់ ប៉ុន្តែ​ខ្ញុំ​គិតថា Messi គឺ​ពោរពេញ​ដោយ​ជីវិត​ជា​កីឡាករ ជា​អ្នក​ដែល​ធ្វើ​ឲ្យ​គ្រប់​គ្នា​ញញើត ហើយ​តែងតែ​ជា​កីឡាករ​ល្អ​បំផុត…”។

លោក​បាន​បន្ថែម​ទៀត​ថា៖ “Cristiano Ronaldo គឺ​មាន​​ស្ទីល​ខុស​ប្លែក​ពី​គេ។ គាត់​មិន​ចាប់​អារម្មណ៍​នឹង​លេង​ជា​​ខ្សែ​បម្រើ​ទេ គាត់​មិន​ចាប់​អារម្មណ៍​នឹង​ការ​ប្រែប្រួល​នៅ​ក្នុង​ការ​ប្រកួត​ទេ។ … គាត់​ចាប់​អារម្មណ៍​តែ​ការ​បញ្ចប់​ទី​ប៉ុណ្ណោះ ហើយ​ការ​បញ្ចប់​ទី​របស់​គាត់​ពិត​ជា​អស្ចារ្យ​ណាស់”។

Vicente del Bosque បាន​បន្តថា៖ “Neymar ជា​កីឡាករ​មួយ​រូប​ដែល​មិន​មាន​​អ្នក​ដូច​នា​ពេល​​បច្ចុប្បន្ន ដែល​វា​ជា​ស្តាយ​ផ្ទាល់​ខ្លួន​របស់​គាត់។ វា​ជា​អ្វី​មួយ​ដែល​មាន​នៅ​ក្នុង​ខ្លួន​កីឡាករ​បាល់​ទាត់​ប្រភេទ​​នោះ”។

ប្រភព: Sportskeeda