Zidane ប្រាប់​ក្លឹប Real Madrid ឲ្យ​ចុះ​ហត្ថលេខា​លើ​ខ្សែ​បម្រើ​ម្នាក់​ពី Premier League

អតីត​អ្នក​ចាត់ការ​ទូទៅ​របស់​ក្លឹប​អធិរាជស Real Madrid លោក Zinedine Zidane បាន​ណែនាំ​ខ្សែបម្រើ​ដែល​លេង​នៅ​ក្របខណ្ឌ Premier League ម្នាក់​ដល់​អតីត​ក្លឹប​របស់​គាត់ ដោយ​មើល​ឃើញ​ថា កីឡាករ​រូប​នោះ​មាន​សមត្ថភាព​សមស្រប​តាម​ស្ថានភាព​ដែល​ក្លឹប​គួរ​ទិញ​យក។

យោងតាម​សារព័ត៌​មាន​របស់ Diario Gol បាន​ឲ្យ​ដឹង​ថា លោក Zinedine Zidane ដែល​ធ្លាប់​ជា​គ្រូ​បង្វឹក​ដឹកនាំ Real Madrid ឲ្យ​ឈ្នះ​ពាន​រង្វាន់ UEFA Champions League ចំនួន​បី​លើក​ជាប់ៗ​គ្នា បាន​ផ្តល់​យោបល់​ដល់​ក្រុម​ប្រឹក្សា​ភិបាល​របស់​ក្លឹប ឲ្យ​ចុះ​ហត្ថលេខា​លើ​កីឡាករ Youri Tielemans របស់​ក្រុម Leicester City។

ជា​ការ​ពិត​ណាស់ គុណភាព​លេង​របស់ Youri Tielemans ពិត​ជា​គួរ​ឲ្យ​ចាប់​អារម្មណ៍​ខ្លាំង កាល​ពី​រដូវកាល​មុន​ជា​មួយ​ក្លឹប Leicester City ហើយ​ក៏​ធ្វើ​ឲ្យ​មាន​ក្លឹប​ជា​ច្រើន​ដាក់​ចំណាប់​អារម្មណ៍​យ៉ាងខ្លាំង ដោយ​ចង់​បាន​ខ្សែ​បម្រើ​សញ្ជាតិ​បែលហ្សិក​រូបនេះ។

Real Madrid នៅតែ​ព្យាយាម​ស្វែងរក​ការ​ពង្រឹង​ខ្សែបម្រើ​របស់​ពួក​គេ ហើយ Youri Tielemans បាន​ស្ថិត​នៅ​លើ​រ៉ាដា​របស់​ក្លឹប​ផង​ដែរ។ អ្វី​ដែល​កាន់​តែ​ពិសេស​ជាង​នេះ​ទៀត​នោះ Tielemans ក៏​ចង់​ចាកចេញ​ពី​ក្លឹប​បច្ចុប្បន្ន​របស់​ខ្លួន​ដែរ ហើយ​កុងត្រា​របស់​គាត់​នៅ​សល់​ត្រឹម​តែ​មួយ​ឆ្នាំ​ទៀត​ប៉ុណ្ណោះ​ជាមួយ Leicester City។

ក្លឹប Real Madrid បាន​ចុះ​ហត្ថលេខា​លើ​ខ្សែបម្រើ​ឆ្នើមៗ​ពីរ​រូប​រួច​ហើយ​កាល​ពី​ពេល​កន្លង​មក​​ដូចជា Eduardo Camavinga និង Aurelien Tchouameni ជាដើម ប៉ុន្តែ​គេ​ត្រូវ​ការ​កីឡាករ​ដែល​លេង​បាន​ស៊ីជម្រៅ​បន្ថែម​ទៀត។ ដូច្នេះ​ហើយ Zidane ក៏​បាន​ផ្ដល់​ការ​ណែនាំ​ខ្សែបម្រើ​រូប​នេះ។

ទោះ​ជា​យ៉ាង​ណា​ក៏​ដោយ​របាយការណ៍​ផ្សេង​ទៀត​បាន​អះអាង​ថា Youri Tielemans មិន​មែន​ជាជម្រើស​ទី​មួយ​សម្រាប់​ក្លឹប Real Madrid នោះ​ទេ ដោយ​ពួក​គេ​កំពុង​តែ​សម្លឹង​មើល​ការ​ចុះ​ហត្ថលេខា​លើ​ខ្សែបម្រើ​ដែល​កំពុង​ឡើង​ជើង​ខ្លាំង Jude Bellingham របស់​ក្លឹប Borussia Dortmund។

ប្រភព: Dailypost NG