Inter Milan កំពុង​ចាប់​អារម្មណ៍ និង​តាម​ដាន​លើ​ខ្សែការពារ​ស្លាប Alejandro Balde របស់ Barcelona

នាយក​ប្រតិបត្តិ​របស់​ក្លឹប Inter Milan លោក Beppe Marotta និង​នាយក​ប្រតិបត្តិ​ផ្នែក​កីឡាលោក Piero Ausilio កំពុង​ពិនិត្យ​មើល​ពី​ស្ថានភាព​របស់​ខ្សែការពារ​ស្លាប​វ័យក្មេង Alejandro Balde របស់​ក្លឹប​អ្នក​មាន​បុណ្យ FC Barcelona ដែល​ជា​កីឡាករ​មាន​តម្លៃ​ផ្ទេរ​ទាប និង​អាច​ឲ្យ​ពួក​គេ​ទិញ​បាន។

បើ​យោង​តាម​សារព័ត៌មាន​អ៊ីតាលី Calciomercato.com បាន​រាយការណ៍​ថា ប្រធាន​ក្លឹប Inter Milan កំពុង​ពិចារណា​លើ​ការ​ផ្ទេរ​​កីឡាករ​វ័យ 18 ឆ្នាំ​រូប​នេះ​នៅ​រដូវ​ក្តៅ​ឆ្នាំ​ក្រោយ ប្រសិន​បើ​គាត់​មិន​បន្ត​កុងត្រា​ថ្មី ដោយ​បន្ថែម​ពី​លើ​កុងត្រា​បច្ចុប្បន្ន​ដែល​នឹង​ផុត​កំណត់​នៅ​​ខែ​មិថុនា ឆ្នាំ 2024 ទេ​នោះ។

ទន្ទឹម​នឹង​នេះ​ដែរ Barcelona កំពុង​ព្យាយាម​ចាក់សោរ Alejandro Balde ជាមួយ​នឹង​ការ​ត្រៀម​កុងត្រា​ថ្មី ហើយ​ផ្ដល់​ឲ្យ​កីឡាករ​សញ្ជាតិ​អេស្ប៉ាញ​រូប​នេះ​មាន​ជាប់​កុងត្រា​រហូត​ដល់​ខែ​មិថុនា ឆ្នាំ 2027។ ទោះ​ជា​យ៉ាង​ណា រហូត​មក​ដល់​ពេល​នេះ Alejandro Balde មិន​ទាន់​បាន​ទទួល​យក​សំណើរ​របស់ Barcelona ដែល​ជា​ក្លឹប​បច្ចុប្បន្ន​របស់​ខ្លួន​ឡើយ។

យើង​នៅតែ​ត្រូវ​រង​ចាំ​មើល​ថា តើ​ក្លឹប​យក្ស​កាតាឡាន់​នឹង​អាច​ស្វែងរក​កិច្ច​ព្រមព្រៀង​ថ្មី​សម្រាប់ Alejandro Balde បាន​ដែរ រឺ​អត់។ ប៉ុន្តែ​ប្រសិន​បើ​ពួក​គេ​បរាជ័យ នោះ​កុងត្រា​បច្ចុប្បន្ន​របស់​គាត់​នឹង​ឈាន​ចូល​ដល់​រដូវកាល​ចុងក្រោយ​បន្ទាប់​ពី​រដូវក្តៅ​ឆ្នាំ​ក្រោយ។

ដូចគ្នា​នេះ​ដែរ Inter Milan មើល​ឃើញ​ពី​សមត្ថភាព​របស់ Balde ដែល​មាន​ភាព​ស័ក្តិសម​ជា​ខ្សែ​ការពារ​ស្លាប​ឆ្វេង​របស់​ពួក​គេ​បំផុត។ Inter Milan ចង់​ទាញ​ប្រយោជន៍​ពី​ការ​ចរចា​កុងត្រា​មិន​ត្រូវ​គ្នា​រវាង​ក្លឹប និង​កីឡាករ ដើម្បី​អាច​នាំ​យក Alejandro Balde មក​កាន់​ទឹកដី San Siro ក្នុង​តម្លៃ​ទាប​បាន។

ប្រភព: Sempreinter