កំណត់ត្រា 3 របស់ Cristiano Ronaldo ដែល Lionel Messi បាន​បំបែក​នៅ​រដូវ​កាលនេះ

Cristiano Ronaldo និង Lionel Messi គឺ​ជា​កីឡាករ​ពីរ​រូប​ដែល​ជោគជ័យ​បំផុត​ក្នុង​ពិភព​បាល់ទាត់​នា​ពេល​បច្ចុប្បន្ន។ កីឡាករ​ទាំងពីរ​បាន​ឈ្នះ Ballon d’Ors ច្រើន​ជាង​កីឡាករ​ណាៗ​ទាំងអស់ ហើយ​ពួក​គេ​ក៏​ជា​គូ​ប្រជែង​អស់​រយៈពេល​ជាង​មួយ​ទសវត្សរ៍​មក​ហើយ។

ដោយ​ឡែក Cristiano Ronaldo មិន​​មាន​ទម្រង់​លេង​ល្អ​ឡើយ​នៅ​រដូវ​កាល​នេះ។ តារាឆ្នើមរបស់ក្លឹប​បិសាចក្រហម Manchester United រូប​នេះ មិន​សូវ​មាន​ឱកាស​លេង​បាន​ទៀងទាត់​ឡើយ ដោយ​ស៊ុត​បញ្ចូកទី​បាន​ត្រឹមតែ 3 គ្រាប់ និង Assist 1 គ្រាប់​ប៉ុណ្ណោះ​ក្នុង​ការ​បង្ហាញ​ខ្លួន​សរុប 14 ប្រកួត។

ផ្ទុយ​ទៅ​វិញ Lionel Messi ហាក់​ដូច​ជា​បាន​សម្រប​ខ្លួន​យ៉ាង​ល្អ​នៅ​ក្នុង​​ប្រទេស​បារាំង ដោយ​បង្ហាញ​ខ្លួន​ដ៏​ល្អ​ប្រសើរ​នៅ Paris Saint-Germain។ អតីត​តារា​ឆ្នើម​របស់​ក្លឹប Barcelona រូប​នេះ បាន​ស៊ុត​បញ្ចូលទី 11 គ្រាប់ និង​បញ្ជូន​បាល់​ឲ្យ​មិត្តរួម​ក្រុម​ចំនួន 12 លើក ក្នុង​ការ​ប្រកួត​គ្រប់​ក្របខណ្ឌ​ទាំង​អស់​នៅ​រដូវកាល​នេះ។ ជាមួយ​គ្នា​នេះ​ដែរ Lionel Messi ក៏​បាន​បំបែក​កំណត់ត្រា​មួយ​ចំនួន​របស់ Cristiano Ronaldo ទៀត​ផង។

1. Lionel Messi បាន​បំបែក​កំណត់​ត្រា​ស៊ុត​បញ្ចូលទី​លើ​ក្រុម​ផ្សេងៗ​គ្នា​ចំនួន 40 ក្រុម​នៅ UEFA Champions League ខណៈ​ដែល Cristiano Ronaldo មាន​កំណត់​ត្រា​ស៊ុត​បញ្ចូលទី​ទៅ​លើ​ក្រុម​ផ្សេងៗ​គ្នា​ត្រឹមតែ 38 ក្រុម​ប៉ុណ្ណោះ។

2. Lionel Messi បាន​ក្លាយ​ជា​កីឡាករ​ដែល​ឈ្នះកំណត់​ត្រា​របស់ Cristiano Ronaldo ហើយ​ក៏​​ជា​កីឡាករ​ស៊ុត​បញ្ចូលទី​ច្រើន​ជាង​គេ​បំផុត​ក្នុង​ប្រវត្តិសាស្ត្រ​បាល់ទាត់​ផង​ដែរ ដោយមិន​រាប់​បញ្ចូល​គ្រាប់​បាល់​ប៉េណាល់ទី។ បច្ចុប្បន្ន​គាត់​មាន​គ្រាប់​បាល់​មិន​ប៉េណាល់ទី​ចំនួន 681 គ្រាប់ ច្រើន​ជាង Cristiano Ronaldo ដែល​មាន 673 គ្រាប់។

3. Lionel Messi ជា​កីឡាករ​ដែល​រក​បាន​គ្រាប់​ស៊ុត​បញ្ចូលទី​ពី​ក្រៅ​ប្រអប់​គ្រោះថ្នាក់​ច្រើន​ជាង​គេ​នៅ UEFA Champions League។ ខ្សែ​ប្រយុទ្ធ​សញ្ជាតិ​អាហ្សង់ទីន​រូប​នេះ​មាន​គ្រាប់​បាល់​ស៊ុត​បញ្ចូលទី​ក្រៅ​ប្រអប់​គ្រោះ​ថ្នាក់ 23 គ្រាប់ ខណៈ​ដែល Cristiano Ronaldo មាន 22 គ្រាប់។

ប្រភព: Sportskeeda