ប្រធាន​ក្លឹប Joan Laporta បញ្ជាក់​ថា Barcelona មិន​អាច​ចុះ​ហត្ថលេខា​លើ​កីឡាករ​ចំណូល​ថ្មី​បន្ថែម​ទៀត​បាន​ឡើយ

ប្រធាន​ក្លឹប Barcelona លោក Joan Laporta បាន​អះអាង​ថា ក្លឹប​របស់​លោក​នឹង​មិន​អាច​ចុះ​ហត្ថលេខា​លើ​កីឡាករ​ចំណូល​ថ្មី​បន្ថែម​ទៀត​ឡើយ ក្នុង​អំឡុង​ពេល​ទីផ្សារ​ដោះដូរ​កីឡាករ​ខែ​មករា​ឆ្នាំ​ក្រោយ​នេះ ដោយ​សារ​តែ​ការ​រាំង​ពី​ច្បាប់ FFP របស់ La Liga។

យ៉ាង​ណា​មិញ​ទោះ​បី​ជា​មាន​បញ្ហា​ហិរញ្ញវត្ថុ​របស់​ពួក​គេ​ក៏ដោយ ក៏​ក្លឹប​យក្ស​នៅ​កាតាឡាន់​ហាក់​ដូច​ជា​មាន​សកម្មភាព​ខ្លាំង ក្នុង​អំឡុង​ពេល​ទីផ្សារ​រដូវ​ក្តៅ​កន្លង​ទៅ​ដោយ​នាំ​យក​កីឡាករ​ចំណូល​ថ្មី​ជា​ច្រើន​ដូច​ជា Raphinha, Jules Kounde, Robert Lewandowski, Franck Kessie, Andreas Christensen, Hector Bellerin និង Marcos Alonso ជា​ដើម។

មួយ​រយៈ​ចុងក្រោយ​នេះ Barcelona កំពុង​ត្រូវ​បាន​ផ្សារ​ភ្ជាប់​ជាមួយ​នឹង​ការ​ចុះ​ហត្ថលេខា​លើ​កីឡាករ​ចំណូល​ថ្មី​បន្ថែម​ទៀត សម្រាប់​ទីផ្សារ​ដោះដូរ​កីឡាករ​នា​ខែ​មករា​ខាង​មុខ។

ខ្សែ​ការពារ Inigo Martinez របស់ Athletic Bilbao ត្រូវ​បាន​ក្លឹប Barcelona ចាប់​អារម្មណ៍​យ៉ាង​ខ្លាំង​ជាមួយ​នឹង​ផ្ទេរ​ទៅ Camp Nou ខណៈ​ដែល​មាន​ការ​អះអាង​ផងដែរ​ថា ខ្សែបម្រើ Ruben Neves របស់ Wolverhampton Wanderers និង Martin Zubimendi របស់ Real Sociedad ក៏​អាច​នឹង​ធ្លាក់​ក្នុង​កណ្ដាប់​ដៃ​របស់ Barcelona ដែរ។

ទោះ​ជា​យ៉ាង​ណា​ក៏​ដោយ ថ្មីៗ​នេះ​លោក Joan Laporta បាន​អះអាង​ថា ក្លឹប​របស់​គាត់​នឹង​មិន​អាច​ធ្វើ​ការ​ចុះ​ហត្ថលេខា​លើ​កីឡាករ​ចំណូល​ថ្មី​បន្ថែម​ទៀត​នៅ​ដើម​ឆ្នាំ 2023 នេះ​បាន​ឡើយ ដោយ​សារ​តែ​ច្បាប់​របស់​លីគ FFP ដែល​អាច​ពិន័យ​ពួក​គេ​លើ​តុល្យភាព​នៃ​ការ​ចំណូល​ចំណាយ​របស់​ក្លឹប។

ប្រភព: Sportsmole