Barcelona កំពុង​មាន​ភាគរយ​ខ្ពស់​ក្នុង​ការ​ចុះហត្ថលេខា​លើ Sofyan Amrabat ខណៈ​ដែល​តម្លៃ​ផ្ទេរ​អាច​ទទួល​យក​បាន

ក្លឹប​អ្នក​មាន​បុណ្យ Barcelona កំពុង​មាន​ភាគរយ​ខ្ពស់​ដែល​អាចនឹង​ចុះ​ហត្ថលេខា​លើ​ខ្សែ​បម្រើ​ឆ្នើម​សញ្ជាតិ​ម៉ារ៉ុក Sofyan Amrabat របស់ Fiorentina ក្នុង​អំឡុង​ទីផ្សារ​ដោះដូរ​កីឡាករ​នា​រដូវក្តៅ​នេះ ក្នុង​តម្លៃ​ចន្លោះ​ពី 20 លាន​អឺរ៉ូ (17,6 លាន​ផោន) ទៅ 25 លាន​អឺរ៉ូ (22 លាន​ផោន)។

យ៉ាង​ណា​មិញ កាល​ពី​សប្ដាហ៍​មុន​ខ្សែបម្រើ Sergio Busquets បាន​ប្រកាស​ចាកចេញ​ពី​ក្លឹប​ជា​ផ្លូវការណ៍ ដោយ​គាត់​នឹង​មិន​ចុះ​កុងត្រា​ថ្មី​បន្ត​នៅ Camp Nou ឡើយ។ ខ្សែបម្រើ​ដែល​មាន​បទពិសោធន៍​ក្រាស់ក្រែល​របស់​ក្លឹប​រូបនេះ​នឹង​ចាកចេញ​ពី​ក្លឹប​យក្សកាតាឡាន់​នៅ​ចុង​ខែ​មិថុនា​ខាង​មុខ​នេះ ដោយ​គ្មាន​តម្លៃ​ខ្លួន។

ជា​លទ្ធផល Barcelona នឹងត្រូវ​ស្វែងរក​បេក្ខភាព​ខ្សែបម្រើ​កណ្ដាល​ឆ្នើម​ម្នាក់​ដើម្បី​មក​ជំនួស​កន្លែង​របស់ Sergio Busquets។ យ៉ាង​ណា​ពួក​គេ​នឹង​ត្រូវ​សម្លឹង​មើល​ថា តើ​មាន​ប្រាក់​ប៉ុន្មាន​សម្រាប់​ចាយ​លើ​ការ​ផ្ទេរ​កីឡាករ​នា​ចុង​បញ្ចប់​នៃ​រដូវកាល​នេះ ព្រោះ​តែ​បញ្ហាហិរញ្ញ​វត្ថុ​របស់​ក្លឹប​នៅ​តែ​ចោទ​ជា​បញ្ហា។

Amrabat ត្រូវ​បាន​ផ្សារ​ភ្ជាប់​យ៉ាង​ខ្លាំង​ជាមួយ​នឹង​ការ​ផ្ទេរ​ទៅ​ចូលរួមជាមួយ Barcelona កាល​ពី​ខែ​មករា​ដើម​ឆ្នាំ​នេះ ប៉ុន្តែ​គ្រប់​យ៉ាង​មិន​អាច​ទៅ​រួច ហើយ​ធ្វើ​ឲ្យ​គាត់​បន្ត​ស្នាក់​នៅ​ក្លឹប​បច្ចុប្បន្ន​រហូត​ដល់​ចប់​រដូវកាល។ យោងតាម​អ្នក​កាសែត Toni Juanmarti បាន​ឲ្យ​ដឹង​ថា Fiorentina ត្រៀម​លក់​កីឡាករ​វ័យ 26 ឆ្នាំ​រូប​នេះ ក្នុង​អំឡុង​ទីផ្សារ​ដោះដូរ​កីឡាករ​រដូវក្តៅ​ខាង​មុខ ជា​មួយ​នឹង​តម្លៃ​ចន្លោះ​ពី 20 លានអឺរ៉ូ ដល់ 25 លានអឺរ៉ូ។ តម្លៃ​ផ្ទេរ​នេះ​មិន​មែន​ជា​តម្លៃ​ដ៏​ខ្ពស់​បំផុត​មួយ​នោះ​ទេ ដែល​ឲ្យ Barcelona ពិចារណា​ចុះ​ហត្ថលេខា​លើ​គាត់​បាន។

ប្រភព: Sportsmole