ធ្លាប់​ជាអតីត​កីឡាករ​របស់​ក្រុម​ជម្រើស​ជាតិ​បារាំង ប៉ុន្តែ Gignac ប្រាប់​ថា ខ្លួន​ចង់​ឲ្យ Messi លើកពាន World Cup ជាមួយ​អាហ្សង់ទីន

ក្រុម​ជម្រើស​ជាតិ​អាហ្សង់ទីន​នឹង​ធ្វើ​ការ​ប្រកួត​វគ្គ​ផ្តាច់ព្រ័ត្រ​នៃ​ពាន​រង្វាន់ FIFA World Cup ជា​លើក​ទី 6 របស់​ពួក​គេ​នៅ​ថ្ងៃ​អាទិត្យ​សប្ដាហ៍​នេះ ដែល​ត្រូវ​ប៉ះ​ជាមួយ​នឹង​អតីត​ម្ចាស់​ជើង​ឯក​បារាំង។ នៅ​ក្នុង​ការ​ប្រកួត​វគ្គ​ផ្ដាច់ព្រ័ត​នេះ​ដែរ អ្នក​វិភាគ និង​កីឡាករ​ជា​ច្រើន​មាន​ការ​ទស្សន៍ទាយ​រៀងៗ​ខ្លួន​របស់​ពួក​គេ ទាក់​ទង​នឹង​ក្រុម​ដែល​នឹង​ក្លាយ​ជា​ម្ចាស់ពាន​ឆ្នាំ​នេះ។

ដោយ​ឡែក​ខ្សែប្រយុទ្ធ​ម្នាក់​របស់​ក្លឹប Tigres និង​​ធ្លាប់​ជា​អតីត​កីឡាករ​របស់​ក្រុម​ជម្រើស​ជាតិ​បារាំង Andre-Pierre Gignac បាន​បង្ហាញ​ពី​បំណង​របស់​គាត់​ដោយ​បើក​ចំហរ​ច្បាស់ៗ​ថា គាត់​ចង់​ឲ្យ​ក្រុម​ជម្រើស​ជាតិ​អាហ្សង់ទីន​ដែល​ដឹកនាំ​ដោយ​កាពីតែន​ក្រុម Lionel Messi យក​ឈ្នះ​ប្រទេស​កំណើត​របស់​គាត់ ហើយ​ក្លាយ​ជា​ម្ចាស់​ពាន World Cup 2022។

បន្ទាប់​ពី​ការ​ប្រកួត​វគ្គ 8 ក្រុម​ចុងក្រោយ​រវាង​អាហ្សង់ទីន និង​ហូឡង់ កីឡាករ Andre-Pierre Gignac ត្រូវ​បាន​សួរ​ដោយ FOX Sports អំពី​ប្រទេស​ដែល​គាត់​ចង់​ឲ្យ​ក្លាយ​ជា​ម្ចាស់ពាន World Cup។ ខ្សែ​ប្រយុទ្ធ Andre-Pierre Gignac បាន​និយាយ​ថា៖ “នៅ​ប្រទេស​អាហ្សង់ទីន ពួក​គេ​ចង់​ឈ្នះ World Cup ដោយ​សារ​តែ Messi។ ខ្ញុំ​ជា​ជនជាតិ​បារាំង ប៉ុន្តែ​ខ្ញុំ​ចង់​ឃើញ Messi លើក​ពាន World Cup ព្រោះ​គាត់​សម​នឹង​ទទួល​បាន​វា សម្រាប់​ការ​ចំណាយពេល​ជា​ច្រើន​របស់​គាត់​ជាមួយ​បាល់ទាត់”។

ប្រភព: En.as.com