តើ Lionel Messi នឹង​លេង​ពាន Copa America នៅ​ឆ្នាំ 2024 ដែរ​រឺ​ទេ?

តារា​ឆ្នើម Lionel Messi មិន​ទាន់​បាន​និយាយ​អ្វី​ច្បាស់​ទេ​ថា គាត់​នឹង​លេង​ពាន Copa America នៅ​ឆ្នាំ 2024 ដែល​ធ្វើ​ឡើង​នៅ​សហរដ្ឋ​អាមេរិក រឺ​អត់។ ដោយ​ឡែក​សហរដ្ឋអាមេរិក​នឹង​ធ្វើ​ជា​ម្ចាស់​ផ្ទះ​នៃ​ការ​ប្រកួត​ព្រឹត្តិការណ៍​នេះ ហើយ 2 ឆ្នាំ​បន្ទាប់​ពួក​គេ​ក៏​ជា​ប្រទេស​ដែល​រៀបចំ​សម្រាប់​ការ​ប្រកួត FIFA World Cup ផង​ដែរ។

ទោះ​ជា​យ៉ាង​ណា​ក៏​ដោយ​យោងតាម​សារព័ត៌មាន USA Today បាន​ឲ្យ​ដឹង​ថា នៅ​ឆ្នាំ 2024 ខ្សែ​ប្រយុទ្ធ​ឆ្នើម Lionel Messi ទំនង​ជា​នឹង​មាន​ឈ្មោះ​ក្នុង​ក្រុម​ជម្រើស​ជាតិ​អាហ្សង់ទីន​ដូច​ឆ្នាំ​មុនៗ​ដែរ។ យ៉ាងណា​មិញ អាហ្សង់ទីន​ធ្លាប់​បាន​ឈ្នះពាន Copa America 2021 និង​ថ្មីៗ​នេះ​ពួក​គេ​បាន​លើក​ពាន FIFA World Cup 2022 នៅ​ប្រទេស​កាតា។

ទន្ទឹម​នឹង​នេះ​ដែរ Lionel Messi បាន​ចាកចេញ​ពី​សម្ពាធ​របស់​មជ្ឃដ្ឋាន​បាល់ទាត់​ជា​ច្រើន​រួច​ទៅ​ហើយ ក្រោយ​ពេល​ដែល​គាត់​បាន​ឈ្នះពាន Copa America និង FIFA World Cup ជា​មួយ​ប្រទេស​អាហ្សង់ទីន។ បន្ទាប់​ពី​ជ័យជំនះ​នៅ​ប្រទេស​កាតា Lionel Messi ហាក់​ដូច​ជា​កំពុង​រីករាយ​ក្នុង​ការ​បន្ត​ដំណើរ​ជាមួយ​ក្រុម​ជម្រើស​ជាតិ​របស់​ខ្លួន​បន្ត​ទៀត និង​ថែម​ទាំង​បាន​និយាយ​ថា គាត់​ចង់​ឈ្នះពាន​បន្ថែម​ទៀត​ជា​មួយ​នឹង​អាហ្សង់ទីន។ ដូចគ្នា​នេះ​ដែរ​គ្រូ​បង្វឹក​របស់​ក្រុម​ជម្រើស​ជាតិ​លោក Lionel Scaloni បាន​និយាយ​ថា គាត់​ចង់​ឃើញ​តារា​ឆ្នើម​របស់​ក្លឹប Paris Saint-Germain (PSG) រូប​នេះ​ចូល​លេង​ក្នុង​ការ​ប្រកួត​បាល់ទាត់​ពិភពលោក​នៅ​ឆ្នាំ 2026។

ប្រភព: Sportskeeda