កីឡាករ 5 រូប ដែល​ក្លឹប​ចំណាយ​លុយ​ផ្ទេរ​ច្រើន ប៉ុន្តែ​ទទួល​បាន​ផល​តិច​ខុស​ពី​ការ​រំពឹង​ទុក

រដូវកាល​នៃ​ការ​ដោះដូរ​កីឡាករ​ក្នុង​ខែ​មករា​នេះ​ជិត​នឹង​ត្រូវ​បាន​បិទ​ហើយ ដោយ​ក្លឹប​មួយ​ចំនួន​ក៏​បាន​នាំ​យក​កីឡាករ​ចំណូល​ថ្មី ហើយ​ក្លឹប​មួយ​ចំនួន​ទៀត​បាន​លក់​ចេញ​កីឡាករ​របស់​ខ្លួន។ យើង​ឃើញ​ថា ក្លឹប​តោខៀវ Chelsea គឺ​ជា​ក្លឹប​មួយ​ក្នុង​ចំណោម​ក្លឹប​ជា​ច្រើន​ទៀតដែល​មាន​សកម្មភាព​ផ្ទេរ​កីឡាករ​សកម្មជាង​គេ និង​បាន​ចំណាយ​ប្រាក់​ដ៏​ច្រើន​ផង​ដែរ។ យ៉ាង​ណា​មិញ​ថ្ងៃ​នេះ យើង​នឹង​នាំ​អ្នក​ទាំង​អស់​គ្នា​មក​មើល​ការ​ផ្ទេរ​កីឡាករ​ដែល​ក្លឹប​ផ្សេងៗ​ធ្លាប់​បាន​ចាយ​លុយ​ច្រើន​បំផុត ប៉ុន្តែ​លទ្ធផល​មិន​ល្អ​ដូច​ការ​រំពឹង​ទុក​ឡើយ។

1. Philippe Coutinho (ផ្ទេរ​ពី Liverpool ទៅ Barcelona)

នៅ​ឆ្នាំ 2018 មាន​ការផ្ទេរ​ដ៏​គួរ​ឲ្យ​ភ្ញាក់​ផ្អើល​បំផុត​មួយ​នៅ​ក្នុង​ប្រវត្តិសាស្ត្រ​របស់ Liverpool ប៉ុន្តែ​វា​ជា​រឿង​អាក្រក់​បំផុត​សម្រាប់​ក្លឹប Barcelona ។ ក្លឹប​យក្ស​កាតាឡាន់​បាន​ចំណាយ​ប្រាក់ 120 លានអឺរ៉ូ សម្រាប់ Philippe Coutinho ប៉ុន្តែ​រយៈ​ពេល 4 រដូវកាល​នៅ Barcelona កីឡាករ​សញ្ជាតិ​ប្រេស៊ីល​រូប​នេះ​ស៊ុត​បញ្ចូល​ទី បាន​ត្រឹម​តែ 26 គ្រាប់​ប៉ុណ្ណោះ និង​ត្រូវ​បាន​ក្លឹប​ដាក់​ឲ្យ​ខ្ចី​ជើង​ទៅ Bayern Munich ក្នុង​ឆ្នាំ 2020 ថែម​ទៀត​ផង។

2. Antoine Griezmann (ផ្ទេរ​ពី Atletico Madrid ទៅ Barcelona)

Antoine Griezmann បាន​ផ្ទេរ​ទៅ​ចូលរួម​ជា​មួយ Barcelona នៅ​ឆ្នាំ 2019 ជាមួយ​នឹង​តម្លៃ​ផ្ទេរ 100 លានអឺរ៉ូ។ យ៉ាង​ណា​ខ្សែ​ប្រយុទ្ធ​សញ្ជាតិ​បារាំង​រូប​នេះ មិន​មាន​ភាព​លេចធ្លោរ​ខ្លាំង​ឡើយ​ក្នុង​រយៈ​ពេល 3 រដូវកាល​នៅ Camp Nou។ ទីបំផុត Barcelona ក៏​សម្រេច​ចិត្ត​ដាក់​គាត់​ឲ្យ​ខ្ចី​ជើង​ត្រឡប់​មក​ក្លឹប​ចាស់ Atletico Madrid វិញ។

3. Joao Felix (ផ្ទេរ​ពី Benfica ទៅ Atletico Madrid)

នៅ​ឆ្នាំ 2019 ក្លឹប​ដែល​មិន​សូវ​ហ៊ាន​ចាយ​លុយ​ផ្ដេសផ្ដាស​ច្រើន Atletico Madrid បាន​សម្រេច​ចិត្ត​ផ្ទេរ Joao Felix ក្នុង​តម្លៃ​រហូត​ដល់ 126 លានអឺរ៉ូ។ ផ្ទុយ​មក​វិញ​ខ្សែប្រយុទ្ធ​រូបនេះបាន​បង្ហាញ​សមត្ថភាព​មិន​សម​នឹង​តម្លៃ​ផ្ទេរ​របស់​គាត់​ឡើយ។ រយៈពេល 4 រដូវកាល​នៅ Atletico Madrid គាត់​ស៊ុត​បញ្ចូល​ទី​បាន​ត្រឹមតែ 34 គ្រាប់​ប៉ុណ្ណោះ។

4. Harry Maguire (ផ្ទេរ​ពី Leicester ទៅ Manchester United)

ក្នុង​អំឡុង​ពេល Harry Maguire នៅ​ជាមួយ​ក្លឹប Leicester គាត់​ត្រូវ​បាន​គេ​មើល​ឃើញ​ថា ​ជា​​ខ្សែ​ការពារ​ដ៏​ល្អ​មួយ​រូប​នៅ Premier League សូម្បី​តែ​លោក Pep Guardiola ក៏​ចង់​ចុះហត្ថ​លេខា​លើ​គាត់​ដែរ ក្នុង​អំឡុង​ឆ្នាំ 2019 នោះ។ ដោយ​ឡែក ក្រោយ​ផ្ទេរ​ទៅ​ក្លឹប​បិសាចក្រហម Harry Maguire មិន​បាន​ធ្វើ​ឲ្យ​អ្នកគាំទ្រ​មាន​ស្នាម​ញញឹម​សម​នឹង​តម្លៃ​ផ្ទេរ​រហូត​ដល់ 80 លានផោន​របស់​ខ្លួន​នោះ​ឡើយ។ រហូត​មក​ទល់​នឹង​ពេល​នេះ គ្រូ​បង្វឹក និង​ក្លឹប​បាន​បាត់បង់​ទំនុក​ចិត្ត​ទាំង​ស្រុង​ទៅ​លើ Harry Maguire ទៅ​ហើយ។

5. Nicolas Pepe (ផ្ទេរ​ពី Lille ទៅ Arsenal)

ខ្សែ​ប្រយុទ្ធ​ស្លាប Nicolas Pepe ត្រូវបាន​ក្លឹប​កាំភ្លើងធំ​ចំណាយ​ប្រាក់ 72 លានផោន។ Nicolas Pepe ដែល​ត្រូវ​បាន​អ្នក​គាំទ្រ​រំពឹង​ថា នឹង​មាន​ភាព​លេចធ្លោរ​ខ្លាំងជាមួយ​ក្លឹប​កាំភ្លើងធំ Arsenal នោះ ហាក់​ដូច​ជា​មាន​ភាព​ផ្ទុយ​ស្រឡះ ខណៈ​ដែល​កីឡាករ​សញ្ជាតិ​បារាំង​រូប​នេះ​ស៊ុត​បញ្ចូលទី​បាន 27 គ្រាប់​ប៉ុណ្ណោះ ក្នុង​រយៈពេល 3 រដូវកាល​នៅ Emirates។

ប្រភព: Sportskeeda