Brighton ដាក់​តម្លៃ​ផ្ទេរ​ជាង 70 លានអឺរ៉ូ សម្រាប់​ក្លឹប​ណា​ដែល​ចង់​បាន Mac Allister

ក្លឹប Brighton ត្រូវ​បាន​គេ​រាយការណ៍​ថា បាន​ដាក់​តម្លៃ​ផ្ទេរ 75 លាន​អឺរ៉ូ ដែល​ស្មើ​នឹង 65.8 លានផោន សម្រាប់​ក្លឹប​ណា​ដែល​ចង់​បាន​ខ្សែបម្រើ Alexis Mac Allister របស់​ពួក​គេ។ ការ​ដាក់​តម្លៃ​ដោយ​បើក​ចំហរ​នេះ ស្រប​ពេល​ដែល​គាត់​ទទួល​បាន​ការ​ចាប់​អារម្មណ៍​ពី​ក្លឹប​ធំៗ​មួយ​ចំនួន​រួម​ទាំង Manchester City ផង​ដែរ។

កីឡាករ​វ័យ 24 ឆ្នាំ​រូបនេះ បាន​ក្លាយ​ជា​កីឡាករ​ឆ្នើម​ដែល​លេច​ធ្លោរ​ខ្លាំង​សម្រាប់​ក្លឹប និង​ប្រទេស​អាហ្សង់ទីន​របស់​គាត់​ចាប់​តាំង​ពី​រដូវកាល​ថ្មី​ 2022-2023។ ខ្សែបម្រើ Alexis Mac Allister បាន​បង្ហាញ​ខ្លួន​ស្ទើរ​គ្រប់​ប្រកួត​សម្រាប់ Brighton ហើយ​កាល​ពី​ប៉ុន្មាន​ខែ​មុន កីឡាករ​រូប​នេះ គឺ​ជា​តួ​អង្គ​ដ៏​សំខាន់ ក្នុង​ដំណើរ​ផ្សងព្រេង​នៃ​ការ​លើក​ពាន World Cup ឆ្នាំ 2022 របស់​ក្រុម​ជម្រើស​ជាតិ​អាហ្សង់ទីន​ថែម​ទៀត​ផង។

Mac Allister ស៊ុត​បញ្ចូល​ទី​បាន 7 គ្រាប់​ក្នុង​ការ​បង្ហាញ​ខ្លួន 21 ប្រកួត នៅ​គ្រប់​ព្រឹត្តិការណ៍​ទាំង​អស់​របស់​ក្លឹប។ ពាក្យ​ចចាម​អារ៉ាម​ចុង​ក្រោយ​មួយ​បាន​បង្ហាញ​ថា ក្លឹប​បិសាចក្រហម Manchester United, Chelsea, Arsenal, Atletico Madrid, Juventus និង Inter Milan សុទ្ធតែ​បាន​ចាប់​អារម្មណ៍​ទៅ​លើ Mac Allister។

បច្ចុប្បន្ន​កុងត្រា​របស់ Mac Allister ជាមួយ​ក្លឹប Brighton មាន​សុពលភាព​រហូត​ដល់​ខែ​មិថុនា ឆ្នាំ 2025។ យ៉ាង​ណា​ក៏​ដោយ យោងតាម​របាយការណ៍​ពី Fichajes បាន​ឲ្យ​ដឹង​ថា ក្លឹប Brighton កំពុង​ដឹង​ពី​ស្ថានភាព​របស់​ក្លឹប​មួយ​ចំនួន​កំពុង​ចាប់អារម្មណ៍​លើ Mac Allister ហើយ​ពួក​គេ​បាន​កំណត់​តម្លៃ​នៃ​ការ​ដេញ​ថ្លៃ​រួច​ហើយ គឺ​យ៉ាង​តិច 75 លានអឺរ៉ូ។ Manchester City ជា​ក្លឹប​ដែល​មាន​ភាគរយ​ខ្ពស់​ជាង​គេ​ក្នុង​ការ​ចុះ​ហត្ថលេខា​លើ​កីឡាករ​អាហ្សង់ទីន​រូប​នេះ ដោយ​ពួក​គេ​ចង់​នាំ​យក​គាត់​មក​ជំនួស​កន្លែង​របស់ Ilkay Gundogan ដែល​ត្រៀម​ចាកចេញ​នៅ​ចុង​បញ្ចប់​នៃ​រដូវកាល។

ប្រភព: Sportsmole