Van Dijk បាន​សារភាព​ថា Liverpool កំពុង​សុបិន​ចង់​ឈ្នះ​ពាន 4 ក្នុង​មួយ​រដូវកាល

ខ្សែការពារ​ឆ្នើម Virgil van Dijk បាន​សារភាព​ថា ក្លឹប​ហង្សក្រហម Liverpool កំពុង​សុបិន​ចង់ឈ្នះ 4 ពាន ដែល​មិន​ធ្លាប់​មាន​ក្នុង​ប្រវត្តិសាស្ត្រ​របស់​ក្លឹប។ ប៉ុន្តែ Van Dijk បាន​បន្ថែម​​ថា វា​ពិត​ជា​លំបាក​ណាស់ ព្រោះ​ពួក​គេ​ត្រូវ​ប្រឈម​មុខ​នឹង​ការ​ប្រជែង​ដ៏​ពិបាក​បំផុត។

យ៉ាង​ណា​មិញ ក្រុម​ហង្សក្រហម Liverpool បាន​ឈ្នះពាន Carabao Cup មួយ​រួច​ទៅ​ហើយ កាល​ពី​ដើមរដូវកាល​នេះ ខណៈ​ដែល​បច្ចុប្បន្ន​ពួក​គេ​កំពុង​ស្ថិត​ក្នុង​វគ្គពាក់​កណ្តាល​ផ្តាច់ព្រ័ត្រ​នៃ​ពាន Champions League និង FA Cup វគ្គផ្តាច់ព្រ័ត្រ និង​ជា​ក្រុម​ស្ថិត​នៅ​លេខរៀង​ទី 2 ដែល​ចាញ់ Man City ត្រឹម​តែ​មួយពិន្ទុ​ប៉ុណ្ណោះ​នៅ​តារាង Premier League នាពេល​បច្ចុប្បន្ន​នេះ។

FA Cup គឺ​ជា​ពាន​តែមួយ​គត់​ដែល​អ្នក​ចាត់ការ​ទូទៅ​លោក Jurgen Klopp មិន​ទាន់​ធ្លាប់​បាន​ឈ្នះ​ចាប់​តាំង​ពី​គាត់​មក​ដឹកនាំ​នៅ Liverpool ហើយ Van Dijk លើក​ឡើង​ថា ក្រុម​របស់​គាត់ ពិត​ជា​ចង់​ទទួល​បាន​ពាន​នេះ។

Van Dijk បាន​និយាយ​កាល​ពី​ពេល​ថ្មីៗ​កន្លង​ទៅ​នេះ​ថា “វា​ជា​​អ្វី​ដែល​​អ្នក​​រាល់​គ្នា​​ស្រមៃ​​ចង់​​ឈ្នះ​ គឺ​ឈ្នះ​រាល់​ការ​ប្រកួត​ប្រជែង​​ដែល​នៅ​សល់។… Man City នៅតែ​ស្ថិត​ក្នុង​តំណែង​លេខ​មួយ នោះ​ហើយ​វា​ជារឿងមួយ។ យើង​កំពុង​ប្រឈម​មុខ​នឹង Villarreal ក្នុង​ក្របខ័ណ្ឌ Champions League ដែល​នឹង​មាន​ការ​លំបាក​ខ្លាំង​ណាស់ ហើយ​បន្ទាប់មក​ទៀត គឺ​ការប្រកួតវគ្គផ្តាច់ព្រ័ត្រ​នៃ​ FA Cup។ ដូច្នេះ​យើង​មាន​តែង​រងចាំមើល​វា”។

ប្រភព: 90 Min