Varane បង្ហាញ​បំណង​ចង់​ត្រឡប់​ទៅ​អតីត​ក្លឹប​ចាស់​វិញ ហើយ​ចូល​និវត្តន៍​នៅ​ទីនោះ

កីឡាករ​ឆ្នើម Raphael Varane ដែល​ជា​ខ្សែការពារ​កណ្តាល​របស់​ក្លឹប​បិសាចក្រហម Manchester United បាន​បង្ហើប​ថា គាត់​នៅតែ​មាន​​ចិត្តចង់​ត្រឡប់​ទៅ​អេស្ប៉ាញ​វិញ និង​ចង់​ចូល​និវត្តន៍​នៅ​អតីត​ក្លឹប​ចាស់​របស់​ខ្លួន Real Madrid បើ​ទោះបី​ជា​គាត់​ទទួល​ស្គាល់​ថា ឱកាស​នៃ​ការ​​វិល​ទៅ Bernabeu វិញ ទំនង​ជា​មិន​អាច​ទៅ​រួច​ក៏ដោយ។

យ៉ាង​ណា​មិញ​កីឡាករ​សញ្ជាតិបារាំង​ដែល​ធ្លាប់​បាន​ឈ្នះពាន FIFA World Cup រូប​នេះ បាន​ចំណាយ​ពេល 10 ឆ្នាំ​នៃ​ជីវិត​បាល់ទាត់​របស់​ខ្លួន​ជាមួយ​ក្លឹប​អធិរាជស Real Madrid និង​បាន​ឈ្នះពាន​ស្ទើរ​គ្រប់​យ៉ាង​ជា​មួយ​ក្លឹប​យក្ស​អេស្ប៉ាញ​មួយ​នេះ។ ទោះ​បី​ជា​យ៉ាង​ណា​ក៏​ដោយ ក្នុង​ឆ្នាំ 2021 គាត់​ក៏​ចាកចេញ​ទៅ Old Trafford ជាមួយ​នឹង​តម្លៃ​ផ្ទេរ 40 លានអឺរ៉ូ (35.3 លានផោន)។

កីឡាករ​វ័យ 29 ឆ្នាំ​រូប​នេះ នៅ​តែ​មាន​ភាព​លេច​ធ្លោរ និង​ក្លាយ​ជា​ផ្នែក​មួយ​ដ៏​សំខាន់​របស់​ក្លឹប​បិសាច​ក្រហម តាំង​ពី​ក្លឹប​ស្ថិត​ក្នុង​ស្ថានភាព​យ៉ាប់យ៉ឺន ក្រោម​ការ​ដឹកនាំ​របស់ Ole Gunnar Solskjaer និង Ralf Rangnick កាល​ពី​រដូវកាល​មុន។ មក​ទល់​នឹង​ពេល​នេះ ភាព​ល្អ​ប្រសើរ​នៃ​ការ​ដឹកនាំ​របស់​គ្រូ​បង្វឹក​លោក Erik ten Hag ខ្សែការពារ Raphael Varane បាន​ក្លាយ​ជា​ដៃគូ​ដ៏​ល្អ​នៅ​តំបន់​ការពារ​កណ្ដាល​ជាមួយ Lisandro Martinez។

Varane ដែល​នឹង​ឈាន​ចូល​វ័យ 30 ឆ្នាំ នៅ​ខែ​ក្រោយ មាន​កុងត្រា​នៅ Old Trafford រហូត​ដល់​ចុង​បញ្ចប់​នៃ​រដូវកាល 2024-2025 ហើយ​កីឡាករ​រូប​នេះ​ត្រូវ​បាន​គេ​មើល​ឃើញ​ថា នឹង​មិន​មាន​បំណង​ចាកចេញ​ទៅ​ក្លឹប​ណា​ផ្សេង​ទៀត​ឡើយ មុន​កុងត្រា​ផុត​កំណត់។

យើង​បាន​ដឹង​ថា កាល​ពី​ប៉ុន្មាន​ខែ​មុន Varane បាន​ប្រកាស​ចូល​និវត្តន៍​ពី​ក្រុម​ជម្រើស​ជាតិ​បារាំង ប៉ុន្តែ​គាត់​នៅ​ប្រកប​អាជីព​ជាមួយ​ក្លឹប​ដដែល។ ដោយ​ឡែក​ថ្មីៗ​នេះ​ទស្សនាវដ្តី GQ បាន​ធ្វើ​បទ​សម្ភាសន៍​ជាមួយ​ខ្សែការពារ​រូប​នេះ ហើយ​បង្ហាញ​ពី​ក្លឹប 3 ដែលគាត់​ធ្លាប់​លេង​ជាមួយ មាន​ដូច​ជា Real Madrid, Manchester United និង​ក្លឹប​ពី​កុមារភាព​របស់​គាត់ Lens។ ពួក​គេ​បាន​សួរ​ថា តើ Varane នឹង​ចូល​និវត្តន៍​នៅ​ក្លឹប​ណា? ពេល​នោះ គាត់​បាន​តប​ថា មិន​មាន​ក្លឹប​ណា​ផ្សេង​ឲ្យ​គាត់​ជ្រើសរើស​មុន Real Madrid ឡើយ ប៉ុន្តែ​ការ​ត្រឡប់​ទៅ​វិញ​វា​ពិត​​ជា​មិន​អាច​ទៅ​រួច​នោះ​ទេ។ ដូច្នេះ​ប្រហែល​ជា Manchester United រឺ Lens ជា​ជម្រើស​របស់​គាត់។

ប្រភព: Sportsmole