បាល់ទាត់អន្តរជាតិ
គ្រូបង្វឹករបស់បិសាចក្រហម កំពុងមិនសប្បាយចិត្តជាមួយ Varane ព្រោះគេបានធ្វើរឿងមួយនេះ!!!
យោងទៅតាមគេហទំព័រ TheSun បានរាយការណ៍អំពីការមិនពេញចិត្តរបស់គ្រូបង្វឹក ក្លឹបបិសាចក្រហម Manchester United ទាក់ទងនឹងការបង្ហោះរូបភាពរបស់ខ្សែការពារ Raphael Varane នៅក្នុងបណ្តាញសង្គមអំពីការសម្រាកវិស្សមកាលរបស់គាត់ នៅរមណីយដ្ឋានជិះស្គីមួយ។
យ៉ាងណាមិញ ខ្សែការពារវ័យ 30 ឆ្នាំរូបនេះបានទៅកម្សាន្តនៅកន្លែងជិះស្គីអំឡុងពេលនៃការសម្រាកក្នុងការប្រកួតលីគរបស់ប្រទេសអង់គ្លេស។ គេបានដឹងថា នេះគឺផ្ទុយទៅនឹងកិច្ចព្រមព្រៀងការងាររបស់កីឡាករជាមួយក្លឹប Man United ដែលតម្រូវឲ្យមានការរឹតបន្តឹងខ្លាំងលើការកម្សាន្តផ្សេងៗរបស់កីឡាករ ដើម្បីជៀសវាងការរងរបួសជាយថាហេតុ។
បច្ចុប្បន្ន Raphael Varane គឺជាខ្សែការពារកណ្ដាលដ៏សំខាន់ ដោយបានជួយរកគ្រាប់បាល់ស៊ុតបញ្ចូលទីបាន 1 គ្រាប់ ក្នុងការបង្ហាញខ្លួន 18 ប្រកួត នៅរដូវកាលនេះ។ កុងត្រារបស់ខ្សែការពារសញ្ជាតិបារាំងរូបនេះ ជាមួយក្លឹបបិសាចក្រហមមានសុពលភាពរហូតដល់រដូវក្តៅឆ្នាំ 2025។
ប្រភព: Telecomasia