Alexander-Arnold៖ Messi មិន​ត្រូវ​ការ​ការ​ឈ្នះពាន World Cup ដើម្បី​បញ្ជាក់​ថា គាត់​ជា​កីឡាករ​ល្អ​បំផុត​នោះ​ឡើយ

សម្រាប់​មនុស្ស​ជាច្រើន​យល់​ថា ខ្សែប្រយុទ្ធ​របស់​ក្លឹប​យក្ស​បារាំង Paris Saint-Germain គឺ​កីឡាករ Lionel Messi មិន​ចាំបាច់​ត្រូវការ​ការ​ឈ្នះពាន FIFA World Cup ដើម្បី​ឲ្យ​គេ​ហៅ​ថា ជាកីឡាករ​ដ៏​អស្ចារ្យ​បំផុត​ក្នុង​ប្រវត្តិសាស្ត្រ​នោះទេ។ យ៉ាង​ណា ខ្សែ​ការពារ Trent Alexander-Arnold របស់​ហង្សក្រហម Liverpool ក៏​ជា​មនុស្ស​ម្នាក់ ដែល​ស្ថិត​ក្នុង​ចំណោម​អ្នក​ទាំង​នោះ​ដែរ។

Alexander-Arnold បាន​ប្រាប់ ESPN អាហ្សង់ទីន​ថា៖ “ខ្ញុំ​គិត​ថា​អាហ្សង់ទីន​សម​នឹង​ឈ្នះ​ពាន​នេះ (World Cup 2022) ជាមួយ​នឹង​ទម្រង់​លេង​ដ៏ល្អ និង​ការ​ប្រកួត​ដ៏​អស្ចារ្យ​របស់​ពួក​គេ។ ពិត​ណាស់ សូម​អបអរ​សាទរ អ្វី​ដែល​ពួក​គេ​សម​នឹង​ទទួល​បាន”។ ខ្សែការពារ​រូប​នេះ​បាន​បន្ថែម​ទៀត​ថា៖ “ខ្ញុំ​​គិត​ថា Messi មិន​ចាំ​បាច់​មាន​អ្វី ដើម្បី​បញ្ជាក់​ប្រាប់​នរណា​ម្នាក់​ថា គាត់​ជា​កីឡាករ​ល្អ​បំផុត​នោះ​ឡើយ”។

កន្លងមក​យើង​គ្រប់​គ្នា​បាន​ដឹង​ហើយ​ថា Alexander-Arnold គឺ​ជា​កីឡាករ​ម្នាក់​ដែល​ជា​អ្នកគាំទ្រ Messi អស់​រយៈពេល​ជា​ច្រើន​ឆ្នាំ​មក​ហើយ។ គាត់​ធ្លាប់​សរសើរ​ស្ទីលលេង​របស់​ខ្សែប្រយុទ្ធ​អាហ្សង់ទីន និង​ធ្លាប់​បាន​ហៅ​ម្ចាស់ពាន Ballon d’Or 7 សម័យ​កាល​ថា​ជា “កីឡាករ​ល្អ​បំផុត​មិន​ធ្លាប់​មាន ក្នុង​ប្រវត្តិសាស្ត្រ​បាល់ទាត់” ទៀត​ផង។

ដូចគ្នា​នេះ​ដែរ Lionel Messi បាន​បង្ហាញ​ពី​ភាព​លេចធ្លោរ​ជា​ថ្មី​ម្ដង​ទៀត​នៅ FIFA World Cup 2022 ខណៈ​ដែល​គាត់​បាន​ដឹកនាំ​ក្រុម​ជម្រើស​ជាតិ​អាហ្សង់ទីន​ជាមួយ​នឹង​ការ​រួម​ចំណែក​រក​បាន​គ្រាប់បាល់ 10 គ្រាប់។ គាត់​ក៏​បាន​ក្លាយ​ជា​កីឡាករ​ដំបូង​គេ ដែល​តែងតែ​ស៊ុត​បញ្ចូលទី​យ៉ាង​ហោចណាស់​មួយ​គ្រាប់ ក្នុង​ការ​ប្រកួត​ជុំទី 4 នៃ​វគ្គ​ជម្រុះ World Cup។

ប្រភព: Psgtalk