Pep កំពុង​បង្ហាញ​ក្ដី​ស្រឡាញ់ និង​ពេញ​ចិត្ត Julian Alvarez ដូច​ដែល​ខ្លួន​ធ្លាប់​បាន​ធ្វើ​ចំពោះ Lionel Messi កាល​ពី​មុន​ដែរ

ថ្មីៗ​នេះ​លោក Pep Guardiola ដែល​ជា​គ្រូ​បង្វឹក​របស់​ក្លឹប Manchester City បាន​លើក​ឡើង​ថា លោក​មិន​មាន​អ្វី​បរិយាយ​ឲ្យ​អស់​ពី​​ទម្រង់​លេង​ដ៏​ល្អ​របស់ Julian Alvarez ឡើយ។

យ៉ាង​ណា​មិញ គ្រូ​បង្វឹក​សញ្ជាតិ​អេស្ប៉ាញ​រូប​នេះ​ធ្លាប់​បាន​បណ្ដុះ​បណ្ដាល​កីឡាករ​ល្អៗ​ជា​ច្រើន​នៅ​ក្នុង​ពិភព​បាល់​ទាត់ ជា​ពិសេស​គឺ​តារា​ឆ្នើម Lionel Messi។

Pep Guardiola គឺ​ជា​គ្រូ​បង្វឹក​របស់ Lionel Messi ពេល​ដែល​គាត់​​ដឹកនាំ​នៅ Barcelona ហើយ​តាំង​ពី​ពេលនោះ​មក គាត់​តែងតែ​ពោល​សរសើរ​មិន​ដាច់​ពី​មាត់​ចំពោះ​សមត្ថភាព​របស់​ខ្សែ​ប្រយុទ្ធ​ឆ្នើម​សញ្ជាតិ​អាហ្សង់ទីន​រូប​នេះ និង​ចាត់​ទុក​ថា Messi ជា​កីឡាករ​ល្អ​បំផុត​នៅ​លើ​លោក ដែល​គ្មាន​នរណា​អាច​ប្រៀបប្រដូច​បាន​ឡើយ។

​ពេល​នេះ វា​មិនមែន​ជា​រឿង​អាថ៌កំបាំង​ទេ​ដែល​លោក Pep Guardiola បាន​បង្ហាញ​ក្តី​ស្រឡាញ់​របស់​គាត់​ចំពោះ​ខ្សែប្រយុទ្ធ​វ័យ​ក្មេង Julian Alvarez ដូច​ដែល​គាត់​ធ្លាប់​បាន​ធ្វើ​ចំពោះ Lionel Messi កាល​ពី​មុន​ដែរ។ ថ្វីត្បិតតែ​តែ Erling Haaland គឺ​ជា​ខ្សែ​ប្រយុទ្ធ​ដ៏​សំខាន់ និង​ជា​ជម្រើស​ដំបូង​របស់​ខ្លួន​ក៏​ដោយ ប៉ុន្តែ​គ្រូ​បង្វឹក​រូប​នេះ​តែងតែ​ផ្ដល់​ឱកាស​សម្រាប់ Julian Alvarez ឲ្យ​ចូល​លេង​ស្ទើរ​គ្រប់​ការ​ប្រកួត ដើម្បី​អភិវឌ្ឍន៍​សមត្ថភាព​របស់​កីឡាករ​រូប​នេះ​ឲ្យ​កាន់​តែ​ល្អ​ប្រសើរ។

កាល​ពី​ថ្ងៃ​អាទិត្យ​សប្ដាហ៍​មុន Manchester City បាន​ឈ្នះ 2-1 ទល់​នឹង Fulham ដោយ Alvarez គឺ​ជា​ចំណែក​មួយ​ដ៏​សំខាន់​នៃ​គ្រាប់​បាល់​ទាំង​ពីរ​គ្រាប់​នោះ ដោយ​មួយ​គ្រាប់​ដំបូង​គឺ​ជា​ការ​បង្កើត​ឱកាស​ប៉េណាល់ទី និង​គ្រាប់​ទី​ពីរ​ដែល​ជា​គ្រាប់​ជ័យ​ជំនះ ដោយ​គាត់​បាន​ស៊ុតបញ្ចូលទី​ពី​ចម្ងាយ​យ៉ាង​ល្អ​ឥតខ្ចោះ។ ក្រោយ​ចប់​ការ​ប្រកួត Pep Guardiola បាន​និយាយ​នៅ​ក្នុង​សន្និសីទ​សារ​ព័ត៌មាន​ថា៖ “Alvarez គឺ​ជា​កីឡាករ​ដ៏​ពិសេស​ម្នាក់។ គាត់​ស៊ុត​បញ្ចូលទី​បាន​យ៉ាង​ល្អ​ឥតខ្ចោះ ហើយ​សកម្មភាព​ទាំង​អស់​ដែល​គេ​បាន​ធ្វើ​គឺ​អស្ចារ្យ។ […] គាត់​លេង​ជាមួយ​ក្រុម​ជម្រើស​ជាតិ ដែល​ជា​ជើង​ឯក​ពិភពលោក ហើយ​ប្រសិន​បើ​អ្នក​ជា​កីឡាករ​មិន​ល្អ អ្នក​នឹង​មិន​អាច​លេង​ក្នុង​ក្រុម​ជើង​ឯក​ពិភពលោក​បាន​ទេ។ ខ្ញុំ​សូម​អរគុណ​ក្លឹប​ដែល​បាន​​រក​ឃើញ និង​ចុះ​ហត្ថលេខា​លើ​កីឡាករ​វ័យ​ក្មេង​រូប​នេះ”។

ប្រភព: Mscfootball