ប្រធាន La Liga ប្រាប់​លក្ខខណ្ឌ​ចំនួន 2 ដែល Barcelona អាច​ចុះ​ហត្ថលេខា​នាំ​យក Messi ត្រឡប់​មក​វិញ​បាន

ស្រប​ពេល​ដែល Lionel Messi កំពុង​មាន​រឿង​រកាំរកូស​ជាមួយ​ក្លឹប​បច្ចុប្បន្ន PSG មាន​ពាក្យ​ចចាម​អារ៉ាម​ជា​ច្រើន​បាន​អះអាង​ថា គាត់​នឹង​ចាកចេញ​ពី​ទឹកដី​បារាំង​នៅ​ចុង​បញ្ចប់​នៃ​រដូវកាល​នេះ ដើម្បី​វិល​ត្រឡប់​មក​ក្លឹប​ចាស់ Barcelona វិញ។ កាល​ពី​ប៉ុន្មាន​ថ្ងៃ​មុន PSG បាន​ធ្វើ​ការ​ដាក់​ពិន័យ​ព្យួរ​ប្រកួត​របស់ Messi រយៈពេល 2 សប្ដាហ៍ ដោយ​សារ​គាត់​បាន​ធ្វើ​ដំណើរ​ទៅ​ប្រទេស​អារ៉ាប់​ដោយ​មិន​មាន​ការ​អនុញ្ញាត​ត្រឹមត្រូវ​ពី​ក្លឹប។

យ៉ាង​ណា​មិញ បន្ទាប់​ពី​ចាកចេញ​ពី Barcelona ក្នុង​ឆ្នាំ 2021 ដោយ​សារ​ស្ថានភាព​ហិរញ្ញវត្ថុ​របស់​ក្លឹប Messi បាន​ចុះ​កុងត្រា​រយៈពេល 2 ឆ្នាំ​ជាមួយ PSG ហើយ​កុងត្រា​នោះ​នឹង​ផុត​កំណត់​នៅ​រដូវក្ដៅ​នេះ​ហើយ។ ស្ទើរ​តែ 99.9 ភាគរយ​ទៅ​ហើយ ដែល Lionel Messi ប្រាកដ​ជា​នឹង​ចាកចេញ​ដោយ​គ្មាន​តម្លៃ​ខ្លួន​ពី PSG នៅ​រយៈពេល​ប៉ុន្មាន​ខែ​ខាង​មុខ។

ពិត​ប្រាកដ​ណាស់​ថា Barcelona ចង់​បាន​ខ្សែ​ប្រយុទ្ធ​ឆ្នើម​រូប​នេះ​ត្រឡប់​ទៅ​វិញ ប៉ុន្តែ​ស្ថានភាព​ហិរញ្ញ​វត្ថុ​របស់​ក្លឹប​នៅ​តែ​ត្រូវ​កែ​សម្រួល ដើម្បី​កុំ​ឲ្យ​ខុស​លក្ខខណ្ឌ​របស់ FFP លើ​ចំណូល​ចំណាយ​របស់​ក្លឹប​ចំពោះ​កីឡាករ។ ដូចគ្នា​នេះ​ដែរ របាយការណ៍​ចុង​ក្រោយ​មួយ​ពី​លោក Fabrizio Romano បាន​ឲ្យ​ដឹង​ថា ប្រធាន La Liga លោក Javier Tebas បាន​និយាយ​ថា៖ “ប្រសិន​បើ Barcelona ចុះ​ហត្ថលេខា​លើ Messi នោះ​ប្រាក់​ខែ​របស់​គាត់​នឹង​ត្រូវ​តិច​ជាង​នៅ Paris Saint-Germain។ ការ​ត្រឡប់​មក​វិញ​របស់​គាត់​ពេល​នេះ មាន​លក្ខខណ្ឌ​ដែល​ត្រូវ​ការ​លក់​កីឡាករ​ចេញ​ផង​ដែរ។ ខ្ញុំ​គិត​ថា Barcelona នឹង​សម្រួល​ស្ថានភាព​ពី​ការ​លក់​កីឡាករ​នៅ​រដូវក្តៅ​នេះ”។

ប្រភព: Fabrizio Romano