Julian Alvarez បំបែក​កំណត់ត្រា​មួយ​របស់ Messi ក្រោយ​ស៊ុត​បញ្ចូល​ទី​ទៅ​លើ Real Madrid

កាល​ពី​ការ​ប្រកួត​រំលង​អាធ្រាត​យប់​មិញ​នេះ ក្លឹប​មេឃខៀវ Manchester City បាន​ទម្លាក់ Real Madrid ដោយ​យក​ឈ្នះ​ក្នុង​​លទ្ធផល 4-0 (សរុប​ទាំង​ពីរ​ជើង 5-1) ដែល​ជា​ការ​ប្រកួត​ក្នុង​ក្រប​ខណ្ឌ UEFA Champions League វគ្គ​ពាក់​កណ្តាល​ផ្តាច់ព្រ័ត្រ​ជើង​ទីពីរ។

យ៉ាង​ណា​មិញ Bernardo Silva គឺ​ជា​តួឯក និង​ក្លាយ​ជា​កីឡាករ​ល្អ​បំផុត​ក្នុង​ការ​ប្រកួត​នេះ ដោយ​បាន​ស៊ុតបាល់​បញ្ចូលទី​នៅ​តង់​ទីមួយ 2 គ្រាប់​ម្នាក់​ឯង។ ផ្សេង​ពី​នេះ​ដែរ អ្នកគាំទ្រ​ក៏​មិន​ភ្លេច​ផង​ដែរ​នូវ​គ្រាប់​បាល់​មួយ​គ្រាប់ចុង​ម៉ោង​នៅ​នាទីទី 90+1 ដោយ​ខ្សែប្រយុទ្ធ​ឆ្នើម​ដែល​មាន​រហស្សនាម​ថា​បុរស​ពីងពាង Julian Alvarez។

ក្រៅ​ពី​គ្រាប់​បាល់​ជ័យ​ជំនះ​ដែល​ធ្វើ​ឲ្យ Man City លុត​ក្រុម​ភ្ញៀវ 4-0 នោះ Julian Alvarez បាន​បំបែក​កំណត់​ត្រា​ដ៏​អស្ចារ្យ​មួយ​របស់ Lionel Messi។ ខ្សែ​ប្រយុទ្ធ​របស់​ក្លឹប Man City រូប​នេះ​បាន​ក្លាយ​ជា​កីឡាករ​អាហ្សង់ទីន​ក្មេង​ជាង​គេ ដែល​អាច​រក​គ្រាប់​បាល់​បាន​នៅ​វគ្គ​ពាក់​កណ្តាល​ផ្តាច់ព្រ័ត្រ UEFA Champions League ក្នុង​អាយុ 23 ឆ្នាំ 3 ខែ និង 17 ថ្ងៃ។ គាត់​បាន​បំបែក​កំណត់ត្រា​ដែល​កាន់កាប់​ដោយ Lionel Messi ដែល​រក​គ្រាប់​បាល់​បាន​នៅ​វគ្គ​ពាក់​កណ្ដាល​ផ្ដាច់ព្រ័ត​ដូចគ្នា ក្នុង​​អាយុ 23 ឆ្នាំ 10 ខែ និង 3 ថ្ងៃ។

ប្រភព: Psgtalk