Real Madrid ចង់​ចុះ​ហត្ថលេខា​លើ​កីឡាករ​តម្លៃ 3.5 លានអឺរ៉ូ មួយ​រូប​របស់ Leeds United

ក្លឹប​អធិរាជស Real Madrid ត្រូវ​បាន​គេ​ដឹង​ថា កំពុង​មាន​ការ​ចាប់​អារម្មណ៍​យ៉ាង​ខ្លាំង​ទៅ​លើ Rodrigo Moreno របស់ Leeds United ដែល​មាន​លក្ខខណ្ឌ​នៃ​ការ​ផ្ទេរ​ចេញ​ដ៏​សមរម្យ​មួយ​គឺ​ចំនួន 3.5 លានអឺរ៉ូ។ ខ្សែ​ប្រយុទ្ធ​កណ្ដាល​រូប​នេះ គឺ​ជា​អតីត​កីឡាករ​ដែល​លេង​នៅ​ទឹកដី​អេស្ប៉ាញ​ជាមួយ​ក្លឹប Valencia និង​បាន​ផ្ទេរ​ទៅ​ទឹកដី​អង់គ្លេស​នៅ​ឆ្នាំ 2020។

ដោយ​ឡែក​ថ្មីៗ​នេះ Real Madrid ទើប​នឹង​បញ្ចប់​ការ​ផ្ទេរ​លើ Jude Bellingham ពី Borussia Dortmund ក្នុង​កិច្ច​ព្រមព្រៀង​ដែល​អាច​លើស​ពី 110 លានអឺរ៉ូ។ គោលដៅ​បន្ទាប់​របស់​ពួកគេ​គឺ​ជា​ខ្សែ​ប្រយុទ្ធ​កណ្ដាល Moreno នេះ​ឯង។ របាយការណ៍​ពី Cadena COPE បាន​ឲ្យ​ដឹង​ថា Real Madrid កំពុង​ស្វែងរក​កីឡាករ​ចំណូល​ថ្មី ដើម្បី​មក​ជំនួស​កីឡាករ​ដែល​ចាកចេញ​នៅ​ចុង​បញ្ចប់​នៃ​រដូវកាល​នេះ។

ជាក់​ស្ដែង Real Madrid បាន​ចាត់​ទុក Rodrigo Moreno គឺ​ជា​បេក្ខភាព​ដ៏​សាកសម​សម្រាប់​ជំនួស Mariano Diaz។ ពួក​គេ​គិត​ថា​ ​ការ​ចំណាយ 3.5 លានអឺរ៉ូ ទៅ​លើ​ខ្សែ​ប្រយុទ្ធ​រូប​នេះ​គឺ​ជា​គំនិត​មួយ​ល្អ​បំផុត ហើយ Rodrigo Moreno ក៏​ចង់​ចាកចេញ​ពី Leeds ផង​ដែរ ស្រប​ពេល​ដែល​ក្លឹប​របស់​ខ្លួន​បាន​ធ្លាក់​ទៅ​លេង​នៅ Championship។

ប្រភព: Sportskeeda