5 ហេតុផល​ដែល Man City អាច​នឹង​បរាជ័យ​ក្រោម​ថ្វី​ជើង Inter Milan នៅ​ក្នុង​ការ​ប្រកួត​វគ្គ​ផ្ដាច់ព្រ័ត UCL

ក្លឹប​មេឃខៀវ Manchester City គឺ​ជា​ក្រុម​ដែល​មជ្ឃដ្ឋាន​បាល់​ទាត់​មើល​ឃើញ​ថា នឹង​ក្លាយ​ជា​ម្ចាស់ពាន​ក្នុង​វគ្គផ្តាច់ព្រ័ត្រ UEFA Champions League ទល់​នឹង Inter Milan នៅថ្ងៃ​អាទិត្យ​ខាង​មុខ​នេះ។ Man City បាន​យក​ឈ្នះ​ក្លឹប​អធិរាជស Real Madrid នៃ​ការ​ប្រកួត​វគ្គពាក់​កណ្តាល​ផ្តាច់ព្រ័ត្រ ក្នុង​លទ្ធផល​សរុប​ទាំង​ពីរ​ជើង 5-1។

ទោះ​បី​ជា​បែប​នេះ​ក៏​ដោយ Inter Milan ក៏​ជា​ក្រុម​ខ្លាំង​មួយ​ប្រចាំ​លីគ​អ៊ីតាលី​ផង​ដែរ ដោយ​មុន​នឹង​ឡើង​មក​ដល់​វគ្គ​ផ្ដាច់ព្រ័ត​នេះ ពួក​គេ​បាន​ទម្លាក់ AC Milan ដែល​ស្ថិត​ក្នុងលីគ​ជា​មួយ​គ្នា ក្នុង​លទ្ធផល​សរុប 3-0 ដោយ​គ្មាន​តដៃ​បាន។ យ៉ាង​ណា​មិញ ថ្ងៃ​នេះ​ក្រុម​ការងារ​យើង​នឹង​បង្ហាញ​ជូន​ហេតុផល​សំខាន់ៗ​ចំនួន 5 ដែល Man City អាច​នឹង​បរាជ័យ​ក្រោម​ថ្វី​ជើង​របស់ Inter Milan។

1. គ្រូ​បង្វឹក Simone Inzaghi តែងតែ​ឈ្នះពាន នៅ​ក្នុង​ការ​ប្រកួត​វគ្គ​ផ្ដាច់ព្រ័ត

គ្រូ​បង្វឹក​របស់​ក្លឹប Inter Milan លោក Simone Inzaghi បាន​បរាជ័យ​ក្នុង​ការ​ដឹកនាំ​ក្រុម​នៅ​ក្នុង​លីគ​ចំនួន​ពីរ​រដូវកាល​ដំបូង​របស់​គាត់។ ទោះ​ជា​យ៉ាង​ណា​ក៏​ដោយ គេ​កត់​សម្គាល់​ថា Inzaghi ពូកែ​ក្នុង​ការ​ប្រកួត​វគ្គ​ផ្ដាច់ព្រ័ត​លើក​ពាន ហើយ​ថ្មីៗ​នេះ​ពួក​គេ​ទើប​នឹង​បាន​ឈ្នះ Supercoppa Italiana និង Italian Cup ផង​ដែរ។

2. Man City ធ្លាប់​បាន​បរាជ័យ​ក្នុង​វគ្គ​ផ្ដាច់ព្រ័ត UEFA Champions League

ទោះ​បី​ជា Manchester City ជា​ក្រុម​ដែល​មាន​ភាគរយ​ខ្ពស់ ក្នុង​ការ​ឈ្នះពាន UCL រដូវកាល​នេះ​ក៏​ដោយ ពួក​គេ​ធ្លាប់​បរាជ័យ​ម្ដង​រួច​មក​ហើយ នៅ​វគ្គ​ផ្តាច់​ព្រ័ត្រ​កាល​ពី​ឆ្នាំ 2021 ក្រោម​ថ្វី​ជើង​របស់​តោខៀវ Chelsea។ ពួក​គេ​ជា​ក្រុម​ដែល​មិន​ធ្លាប់​មាន​ប្រវត្តិឈ្នះពាន​នេះ​ឡើយ ខណៈ​ដែល Inter Milan ធ្លាប់​ឈ្នះ​វា​បាន 3 ដង។

3. ទម្រង់​លេង 3-5-2 របស់ Inter Milan

ក្លឹប​យក្ស​អ៊ីតាលី Inter Milan ប្រើ​ខ្សែការពារ​បី​នាក់​ដូច Man City ដែរ។ ប៉ុន្តែ​ភាព​ខុសគ្នា​ដ៏​សំខាន់​មួយ​គឺ Inter Milan ប្រើ​ខ្សែការពារ​ស្លាប​សងខាង​ដែល​រត់​ឡើង​ចុះ​យ៉ាង​សកម្ម​បំផុត និង​ជា​ចលករ​ដ៏​សំខាន់​នៅ​ទីលាន។ Man City ប្រើ​ប្រព័ន្ធ 3-4-3 តែ Inter Milan ប្រើ​ទម្រង់ 3-5-2។

2. Inter Milan មាន​ខ្សែការពារ​ល្អ​បំផុត

ខ្សែ​ការពារ​របស់ Inter Milan ធ្វើ​បាន​ល្អណាស់​ក្នុង​រដូវកាល​នេះ ដែល​មាន Bastoni, Stefan de Vrij និង Matteo Darmian។ លើស​ពី​នេះ​ទៅ​ទៀត​អតីត​អ្នកចាំទី​របស់ Ajax គឺ​កីឡាករ Andre Onana មាន​ទម្រង់​លេង​យ៉ាង​ល្អ​នាពេល​បច្ចុប្បន្ន និង​ត្រូវ​បាន​គេ​ចាត់​ទុក​ថា ជា​អ្នក​ចាំទី​ដ៏​ល្អ​បំផុត។ Inter Milan បាន​រក្សា Clean Sheet 5 ដង ក្នុង​ចំណោម 6 ប្រកួត នៃ​ការ​ប្រកួត​វគ្គ​ចែក​ពូល UEFA Champions League របស់​ពួកគេ​នៅ​រដូវកាល​នេះ។

1. ការ​លេង​ដ៏​យល់​ចិត្ត​គ្នា​រវាង Romelu Lukaku និង Lautaro Martinez

Romelu Lukaku និង Lautaro Martinez គឺ​ជា​ខ្សែ​ប្រយុទ្ធ​ដែល​យល់​ចិត្ត​គ្នា​បំផុត។ អ្នក​ទាំង​ពីរ​ធ្លាប់​បាន​ជួយ Inter Milan ឲ្យ​ឈ្នះពាន Serie A កាល​ពី​រដូវកាល​ឆ្នាំ 2020-2021។ ថ្វីបើ Lukaku មាន​ទម្រង់​លេង​មិន​ល្អ​ពេល​ផ្ទេរ​ទៅ Chelsea ប៉ុន្តែ​បាន​ត្រឡប់​មក Inter Milan ក្នុង​លក្ខខណ្ឌ​ខ្ចី​ជើង​នៅ​រដូវកាល​នេះ គាត់​នៅ​តែ​ជា​ខ្សែ​ប្រយុទ្ធ​ដ៏​មុតស្រួច​មួយ​រូប​ដដែល ដោយ​ក្នុង 11 ប្រកួត​ចុង​ក្រោយ គាត់​រក​បាន 7 គ្រាប់ និង​បញ្ជូន​បាល់​ឲ្យ​មិត្ត​រួម​ក្រុម​បាន 5 ដង។ ទន្ទឹម​នឹង​នេះ​ដែរ Martinez ក៏​អស្ចារ្យ​ផង​ដែរ ដោយ​គាត់​បាន​ស៊ុតបញ្ចូលទី 11 គ្រាប់ និង​បញ្ជូន​បាល់​ឲ្យ​មិត្ត​រួម​ក្រុម​បាន​ចំនួន 4 ដង ក្នុង​ការ​ប្រកួត 13 លើក​ចុងក្រោយ​របស់​គាត់​សម្រាប់ Inter Milan។

ប្រភព: Sportskeeda