Azpilicueta កំពុង​ត្រូវ​បាន Bayern Munich និង Inter Milan ចាប់​អារម្មណ៍​ខ្លាំង

យោងតាម​របាយការណ៍​ចុង​ក្រោយ​មួយ​បាន​ឲ្យ​ដឹង​ថា ក្លឹប​យក្ស​អាឡឺម៉ង់ Bayern Munich កំពុង​ប្រឈម​នឹង​ការ​ប្រកួត​ប្រជែង​ពី​ក្លឹប Inter Milan សម្រាប់​ការ​ចុះ​ហត្ថលេខា​លើ​ខ្សែ​ការពារ​របស់ Chelsea គឺ​កីឡាករ Cesar Azpilicueta។ ខ្សែការពារ​វ័យ 34 ឆ្នាំ​រូប​នេះ នឹង​នៅ​សល់​តែ​កុងត្រា 12 ខែ​ទៀត​ប៉ុណ្ណោះ​ដើម្បី​បន្ត​នៅ Stamford Bridge ដោយ​សារ​គាត់​បាន​បន្ត​កុងត្រា​រយៈពេល​ខ្លី​ប៉ុណ្ណោះ​នៅ​មុន​រដូវកាល 2022-2023។

Azpilicueta ត្រូវ​បាន​ក្លឹប Barcelona ចាប់​អារម្មណ៍ និង​ចង់​នាំ​យក​គាត់​ទៅ​ទឹកដី​អេស្ប៉ាញ​កាល​ពី​រដូវកាល​មុន ប៉ុន្តែ​ត្រូវ​បាន​គាត់​បដិសេធ ដោយ​សារ​ការ​ស្រឡាញ់​ក្លឹប និង​ចង់​បន្ត​ជីវិត​នៅ​ក្នុង​ទឹកដី​អង់គ្លេស​បន្ត​ទៀត ខណៈ​ដែល​ពេល​នោះ Marcos Alonso និង Andreas Christensen បាន​ចាកចេញ​ទៅ Camp Nou។

ទោះ​ជា​យ៉ាង​ណា​ក៏​ដោយ ការ​សម្រេច​ចិត្ត​របស់​អតីត​កីឡាករ​របស់​ក្លឹប Marseille រូបនេះ ត្រូវ​បាន​គេ​មើល​ឃើញ​ថា ជា​ការ​សម្រេច​ចិត្ត​ខុស ដោយ Barcelona បាន​សម្រេច​ក្ដី​ស្រមៃ​ក្នុង​ការ​លើក​ពាន​លីគ (La Liga) ប៉ុន្តែ​តោខៀវ Chelsea កំពុង​មាន​ទម្រង់​លេង​ធ្លាក់​ចុះ​ជា​ខ្លាំង និង​ថែម​ទាំង​បាន​បញ្ចប់​ក្នុង​ចំណាត់​ថ្នាក់​លេខ 12 នៃ​តារាង Premier League។

ជាមួយ​នឹង​រឿង​បរាជ័យ​ជា​ច្រើន រួម​ទាំង Malo Gusto គ្រោង​នឹង​វិល​ត្រឡប់​ពី​ការ​ខ្ចី​ជើងនៅ Lyon ដើម្បី​ប្រកួត​ប្រជែង​តំណែង​លេង​ជាមួយ Reece James ធ្វើ​ឲ្យ Azpilicueta ក្លាយ​ជា​ខ្សែការពារ​ស្ដាំ​ជម្រើស​ទី​បី​របស់​ក្លឹប ហើយ​ពេល​នេះ​ជា​វេលា​ដ៏​សមស្រប​​សម្រាប់​គាត់​ក្នុង​ការ​ចាកចេញ​ពី​ទឹកដី​អង់គ្លេស។ យោងតាម​របាយការណ៍​ពី Sky Italia បាន​អះអាង​ថា Inter Milan និង Bayern Munich កំពុង​ក្លាយ​ជា​គូ​ប្រជែង​នឹង​គ្នា ក្នុង​ការ​ចរចា​លើ Azpilicueta ដែល​ជា​កីឡាករ​ចាស់​វស្សា និង​ពោរពេញ​ដោយ​បទ​ពិសោធន៍​ក្រាស់​ក្រែល​បំផុត។

ប្រភព: Sportsmole