Jose Mourinho ប្រាប់​ក្លឹប​របស់​ខ្លួន​ឲ្យ​ចុះ​ហត្ថលេខា​លើ Fred

គ្រូបង្វឹក​របស់​ក្លឹប AS Roma លោក Jose Mourinho ត្រូវ​បាន​គេ​រាយការណ៍​ថា កំពុង​កំណត់​គោលដៅ​ផ្ទេរ​ខ្សែបម្រើ Fred របស់បិសាចក្រហម Manchester United ក្នុង​អំឡុង​ពេល​នៃ​ទីផ្សារ​ដោះដូរ​កីឡាករ​រដូវក្តៅ​នេះ។ ទន្ទឹម​នឹង​នេះ​ដែរ Fred កំពុង​ជួប​ប្រទះ​នូវ​បញ្ហា​ដោយ​មិន​សូវ​មាន​ឱកាស​បង្ហាញ​សមត្ថភាព​នៅ​លើ​ទីលាន ដោយ​ភាគ​ច្រើន​ជម្រើស​ដំបូង​របស់​គ្រូ​បង្វឹក​លោក Erik ten Hag ជា​ខ្សែ​បម្រើ​ផ្សេង​ទៀត។

កីឡាករ​វ័យ 30 ឆ្នាំរូប​នេះ គឺ​ជា​កីឡាករ​ដែល​មិន​សូវ​សំខាន់​ឡើយ​សម្រាប់​បិសាចក្រហម ក្នុង​អំឡុង​យុទ្ធនា​ការ​នៃ​ការ​ប្រកួត​ប្រជែង​កាល​ពី​រដូវកាល​មុន 2022-2023 ដោយ​បង្ហាញ​ខ្លួន​បាន​សរុប 56 ប្រកួត ដោយ​ស៊ុតបញ្ចូលទី​បាន 6 គ្រាប់ និង​បញ្ជូន​បាល់​ឲ្យ​មិត្ត​រួម​ក្រុម​បាន​ចំនួន 6 ដង។ យ៉ាង​ណា​ក្នុង​ចំណោម 35 ប្រកួត នៅ​ក្របខ័ណ្ឌ Premier League ខ្សែបម្រើ​រូប​នេះ​បាន​បង្ហាញ​ខ្លួន​ជា​ជម្រើស 11 នាក់​ដំបូង​ត្រឹមតែ 12 ដង​ប៉ុណ្ណោះ។

កាលពី​មួយ​រយៈមុន Fred ធ្លាប់​បាន​និយាយ​ថា គាត់​ចង់​មាន​ឱកាស​បង្ហាញ​ខ្លួន​នៅ​លើទីលាន​បាន​ច្រើន​ឡើង​វិញ និង​ចង់​ក្លាយ​ជា​កីឡាករ​សំខាន់​ម្នាក់​របស់​បិសាចក្រហម។ ទន្ទឹម​នឹង​នេះ​ដែរ កុងត្រា​របស់​ខ្សែបម្រើ​សញ្ជាតិ​ប្រេស៊ីល​រូប​នេះ​នៅ Old Trafford នឹង​ត្រូវ​ផុត​កំណត់​នៅ​ខែ​មិថុនា ឆ្នាំ​ក្រោយ ហើយ​កំពុង​មាន​ការ​សង្ស័យ​ថា គាត់​អាច​នឹង​ចាកចេញ​នៅ​រដូវក្ដៅ​នេះ​មុន​ក្លាយ​ជា​កីឡាករ​ដែល​គ្មាន​តម្លៃ​ខ្លួន។

ក្លឹប Fulham ធ្លាប់​បាន​ចាប់​អារម្មណ៍ Fred ហើយ​គេ​ជឿថា Manchester United ក៏​បាន​បើក​ភ្លើង​ខៀវ​លើ​រឿង​នេះ​ដែរ ដោយ​កំណត់​តម្លៃ​ផ្ទេរ​ចេញ​របស់​គាត់​ក្នុង​តម្លៃ​ខ្លួន 20 លានផោន។ យោងតាម​របាយការណ៍​ចុង​ក្រោយ​មួយ​ពី​កាសែត The Sun បាន​ឲ្យ​ដឹង​ថា ក្លឹប AS Roma ចាប់​អារម្មណ៍​ក្នុង​ការ​ចុះ​ហត្ថលេខា​លើ Fred ដោយលោក Jose Mourinho ជា​គ្រូ​បង្វឹក​របស់​ក្លឹប​បាន​ជម្រុញ​ខ្លាំង​លើ​រឿង​នេះ។

ប្រភព: Sportsmole