Cafu ផ្ដាំ​ផ្ញើ​ទៅ​កាន់​កីឡាករ​ម្នាក់​របស់ Arsenal ថា៖ កុំ​អស់​សង្ឃឹម ថ្ងៃ​ណា​មួយ​ឱកាស​របស់​គេ​នឹង​មក​ដល់

វីរបុរស​របស់​ប្រេស៊ីល​លោក Cafu បាន​ផ្ញើសារ​មួយ​ទៅ​កាន់​តារាឆ្នើម​របស់​ក្លឹប​កាំភ្លើងធំ Arsenal គឺ​ខ្សែ​ការពារ Gabriel Magalhaes ដោយ​បាន​ជម្រុញ​ឲ្យ​គាត់​កុំ​អស់​សង្ឃឹមព្រោះ​តែ​មិន​ត្រូវ​បាន​កោះ​ហៅ​ឲ្យ​ចូល​លេង​ក្នុង​ក្រុម​ជម្រើស​ជាតិ។ យ៉ាង​ណា​មិញ Cafu ធ្លាប់​ជា​កីឡាករ​ឆ្នើម និង​ដើរ​​តួ​ជា​កាពីតែន​ក្រុម​ដែល​បាន​ឈ្នះ​ពាន World Cup ឆ្នាំ 2002 ជាមួយ​ក្រុម​ជម្រើស​ជាតិ​ប្រេស៊ីល​ផង​ដែរ។

យើង​ឃើញ​ថា Magalhaes គឺ​ជា​ខ្សែការពារ​ដ៏​លេច​ធ្លោរ និង​រឹងមាំ​ម្នាក់​សម្រាប់​ក្លឹប​កាំភ្លើងធំ​ចាប់​តាំង​បាន​មក​ដល់​ទីក្រុងឡុងដ៍​ក្នុង​ឆ្នាំ 2020។ មក​ទល់​នឹង​ពេល​នេះ​គាត់​បាន​បង្ហាញ​ខ្លួន​សរុប​ចំនួន 118 ប្រកួត​ហើយ។ ទោះ​បី​ជា​យ៉ាង​ណា​ក៏​ដោយ ខ្សែការពារ​កណ្ដាល​រូប​នេះ ​មិន​ទាន់​បាន​លេង​តំណាង​ឲ្យ​​ក្រុម​ជម្រើស​ជាតិ​ប្រេស៊ីល​របស់​ខ្លួន​នៅ​ឡើយ​ទេ ទាំង​ការ​ប្រកួត​មិត្តភាព រឺ​ការ​ប្រកួត​ផ្លូវការណ៍​ក្ដី។

សូម្បី​តែ​ពេល​ដែល Magalhaes កំពុង​ឡើង​ជើង​ខ្លាំង​ក៏​ដោយ ក្នុង​អំឡុង​ពេល​នៃ​ដំណើរ​ផ្សងព្រេង​របស់​ក្រុម​ជម្រើស​ជាតិ​ប្រេស៊ីល​ទៅ​កាតា​សម្រាប់​ការ​ប្រកួត FIFA World Cup ឆ្នាំ 2022 គាត់​មិន​ត្រូវ​បាន​កោះហៅ​ឡើយ។ ពាក់ព័ន្ធ​នឹង​រឿង​នេះ​ដែរ Cafu បាន​ចែករំលែក​ដំបូន្មាន​មួយ​សម្រាប់​កីឡាករ​វ័យ 25 ឆ្នាំ​រូប​នេះ​ដោយ​លើក​ឡើង​ថា៖ “Gabriel Magalhaes ត្រូវ​រក្សា​ការ​ព្យាយាម​បន្ត​ទៀត។ ថ្ងៃណា​មួយ​ឱកាស​របស់​អ្នក​នឹង​មក​ដល់។… បន្ត​ធ្វើអ្វី​ដែល​អ្នក​កំពុង​ធ្វើ, បន្ត​ការ​ខំប្រឹងប្រែង​ជាមួយ Arsenal ដែល​ជា​កន្លែង​អ្នក​អាច​ឈ្នះពាន Premier League។ អ្នក​មិន​ត្រូវ​បាន​កោះ​ហៅ​មក​ក្រុម​ជម្រើស​ជាតិ​លើក​នេះ ប៉ុន្តែ​អ្នក​អាច​ត្រូវ​បាន​ហៅ​នៅ​ពេល​អនាគត”។

ប្រភព: Sportskeeda