បាល់ទាត់អន្តរជាតិ
ជំហានបន្ទាប់របស់ Cavani ក្រោយ Valencia បញ្ចប់កុងត្រាមុនកំណត់
ខ្សែប្រយុទ្ធឆ្នើម Edinson Cavani គ្រោងនឹងចូលរួមជាមួយក្លឹប Boca Juniors បន្ទាប់ពីកុងត្រារបស់គាត់ជាមួយក្លឹប Valencia ត្រូវបានបញ្ចប់មុនកំណត់។ កីឡាករវ័យ 36 ឆ្នាំរូបនេះ នឹងចូលរួមជាមួយ Boca Juniors ក្នុងនាមជាកីឡាករដែលគ្មានតម្លៃខ្លួន និងចុះហត្ថលេខាលើកុងត្រារយៈពេល 2 ឆ្នាំ។
យោងតាមអ្នកជំនាញបាល់ទាត់លោក Fabrizio Romano បានឲ្យដឹងថា៖ Edinson Cavani កំពុងត្រៀមចូលរួមជាមួយ Boca Juniors ខណៈដែលការព្រមព្រៀងពាក្យសម្ដីរវាងកីឡាករ និងក្លឹប បានបញ្ចប់ទៅដោយជោគជ័យ លើលក្ខខណ្ឌនៃកុងត្រាដែលមានសុពលភាពរហូតដល់ខែធ្នូ ឆ្នាំ 2024។
គួររំលឹកផងដែរថា Cavani ទើបតែបានចូលរួមជាមួយ Valencia កាលពីមួយឆ្នាំមុនប៉ុណ្ណោះ បន្ទាប់ពីកុងត្រារបស់គាត់នៅ Manchester United បានផុតកំណត់។ ទម្រង់លេងរបស់គាត់មិនអាចរក្សាបានល្អឡើយ ជាមួយនឹងជីវិតថ្មីនៅក្នុងទឹកដីនៃប្រទេសអេស្ប៉ាញ ចំពេលដែលមានបញ្ហារបួសជាច្រើនផងដែរ។
ប្រភព: Dailypost NG