Fermin Lopez ខ្សែបម្រើ​ដែល​ប្រសូត្រ​ចេញ​ពី​ថ្នាល​យុវជន La Masia កំពុង​ត្រូវ​បាន​គេ​មើល​ឃើញ​ថា ជា​អនាគត​ដ៏​ភ្លឺ​ស្វាង​របស់​ក្លឹប

Fermin Lopez មាន​ឈ្មោះ​ពេញ​ថា Fermin Lopez Marin គឺ​ជា​ខ្សែបម្រើ​សញ្ជាតិ​អេស្ប៉ាញ ដែល​កំពុង​ប្រកប​អាជីព​បាល់ទាត់​ជា​មួយ​ក្លឹប​អ្នក​មាន​បុណ្យ Barcelona។ គាត់​បាន​លេង​ឲ្យ​ក្លឹប​យក្ស​កាតាឡាន់​មួយ​នេះ​តាំង​ពី​នៅក្មេងៗ​មក​ម្ល៉េះ ពោល​គឺ​តាំង​ពី​អាយុ 12 ឆ្នាំ។

កីឡាករ​វ័យ​ 20 ​ឆ្នាំ​រូប​នេះ លេង​ក្នុង​តំណែង​ជា​ខ្សែ​បម្រើ​ប្រយុទ្ធ រឺ​អាច​លេង​ជា​​ខ្សែ​​ប្រយុទ្ធ​ស្លាប​​ឆ្វេង​ក៏​បាន។ កាល​ពី​រដូវ​កាល​មុន គាត់​បាន​ស៊ុត​បាល់​បញ្ចូល​ទី​បាន 12 គ្រាប់ និង​បញ្ជូន​បាល់​ឲ្យ​​មិត្ត​រួម​ក្រុម 4 ដង ពេល​ខ្ចី​ជើងជាមួយ​ក្លឹប Linares។ ទោះ​ជា​យ៉ាង​ណា​ក៏​ដោយ Barcelona បាន​នាំ​យក​គាត់​ត្រឡប់​មក​វិញ និង​បាន​ដាក់​គាត់​ឲ្យ​ចូល​លេង​ក្នុង​ដំណើរ​នៃ​ការ​ប្រកួត​មិត្តភាព​មុន​បើក​រដូវកាល​របស់​ពួក​គេ​ផង​ដែរ។

វា​ជា​សញ្ញា​ដ៏​ល្អ​របស់ Fermin Lopez ដែល​គាត់​ទទួល​បាន​ឱកាស​លេង​ជា​មួយ​មិត្ត​រួម​ក្រុម​របស់​ខ្លួន​មុន​បើក​រដូវកាល ប៉ុន្តែ​អ្វី​ដែល​កាន់​តែ​ប្រសើរ​ជាង​នេះ​ទៀត​នោះ ខ្សែ​បម្រើ​វ័យ​ក្មេង​រូប​នេះ​ត្រូវ​បាន​គេ​មើល​ឃើញ​ថា កំពុង​មាន​ទម្រង់​លេង​លេចធ្លោរ​ខ្លាំង និង​អាច​ក្លាយ​ជា​អនាគត​ដ៏​ល្អ​របស់​ក្លឹប។

យ៉ាង​ណា​មិញ​កាល​ពី​ប្រកួត​មិត្តភាព​ទល់​នឹង Real Madrid ម្សិលមិញ​នេះ Fermin Lopez រក​បាន​គ្រាប់​បាល់​ស៊ុត​បញ្ចូលទី​មួយ​គ្រាប់​ដ៏​អស្ចារ្យ និង​បញ្ជូន​បាល់ឲ្យ​មិត្ត​រួម​ក្រុម​បាន​មួយ​គ្រាប់​ទៀត​ផង។ ក្រោយ​ចប់​ការ​ប្រកួត​ដែល Barcelona បាន​លុត Real Madrid 3-0 គ្រូ​បង្វឹក​លោក Xavi Hernandez បាន​និយាយ​ថា៖ “Fermin Lopez នឹង​មិន​ដាក់​ឲ្យ​ខ្ចី​ជើង​ទៅ​ក្លឹប​ផ្សេង​ទៀត​ទេ។ គាត់​នឹង​ត្រូវ​បញ្ចូល​ក្នុង​ក្រុម​ឈុត​ធំ នៅ​រដូវកាល​នេះ”។

ប្រភព: Tribuna