បាល់ទាត់អន្តរជាតិ
លក់ Harry Maguire ចេញរួចហើយ បិសាចក្រហមនឹងនាំយកខ្សែការពារមួយរូបពី Bayern Munich
ខ្សែការពារកណ្តាល Harry Maguire របស់ក្លឹបបិសាចក្រហម កំពុងខិតជិតនឹងចូលរួមជាមួយ West Ham United ហើយ បន្ទាប់ពីក្លឹបទាំងពីរនេះត្រូវបានគេរាយការណ៍ថា បានឈានដល់កិច្ចព្រមព្រៀងជាផ្លូវការណ៍ ក្នុងការផ្ទេរកីឡាករវ័យ 30 រូបនេះ ក្នុងតម្លៃ 30 លានផោន (38.2 លានដុល្លារ)។
ការចាកចេញរបស់ Harry Maguire ធ្វើឲ្យបិសាចក្រហមសម្លឹងមើលការចុះហត្ថលេខាផ្ទេរខ្សែការពារស្ដាំមួយរូបរបស់ Bayern Munich គឺកីឡាករ Benjamin Pavard។ ខ្សែការពារសញ្ជាតិបារាំងរូបនេះត្រូវគេដឹងថា មិនមានចេតនាបន្តកុងត្រាថ្មីរបស់គាត់ឲ្យលើសពីកុងត្រាដែលនឹងផុតកំណត់នៅឆ្នាំ 2024 ទៀតនោះឡើយ។
ស្របពេលជាមួយគ្នានោះ យោងតាមអ្នកយកព័ត៌មានរបស់ Sky Germany លោក Florian Plettenberg បានអះអាងថា ក្លឹបបិសាចក្រហម Manchester United កំពុងតាមដានពីស្ថានភាពរបស់ Benjamin Pavard។ លោក Erik ten Hag ដែលជាគ្រូបង្វឹករបស់ក្លឹប គឺជាអ្នកដែលពេញចិត្តក្នុងការនាំយកខ្សែការពារស្លាបរូបនេះមក Old Trafford ខណៈដែល Bayern Munich ក៏អាចនឹងពិចារណាលក់គាត់ចេញឲ្យបានមុនពេលកុងត្រាផុតកំណត់នៅចុងបញ្ចប់នៃរដូវកាលនេះផងដែរ។
ប្រភព: GOAL