Fikayo Tomori បដិសេធ​ឱកាស ក្នុង​ការ​​​ផ្ទេរ​ទៅ​ចូលរួម​ជាមួយ PSG

ខ្សែ​ការពារ Fikayo Tomori របស់​ក្លឹប AC Milan ត្រូវ​បាន​គេ​រាយការណ៍​ថា បាន​បដិសេធ​ឱកាស​ក្នុង​ការ​ចូលរួម​ជាមួយ​ក្លឹប​យក្ស​បារាំង Paris Saint-Germain ក្នុង​អំឡុង​ពេល​ទីផ្សារ​ដោះដូរ​កីឡាករ​រដូវ​ក្តៅ​ដែល​ទើប​នឹង​បញ្ចប់​ទៅ​ថ្មីៗ​នេះ។

អតីត​កីឡាករ​របស់​ក្លឹប​តោខៀវ Chelsea រូបនេះ​បាន​បរាជ័យ​ក្នុង​ការ​ប្រជែង​តំណែង​លេង​ពេល​គាត់​នៅ Stamford Bridge ប៉ុន្តែ​ចាប់​តាំង​ពីរ​បាន​មក​ដល់ AC Milan ក្រោម​ការ​ដឹកនាំ​របស់​គ្រូ​បង្វឹក​លោក Stefano Pioli គាត់​បាន​រីក​ចម្រើន​ខ្លាំង រហូត​ត្រូវ​បាន​គេ​ចាត់​ទុក​ជា​ខ្សែការពារ​ដ៏​ល្អ​បំផុត​មួយ​រូប​នៅ​ក្នុង​ពិភព​បាល់ទាត់។

ដំបូង​ឡើយ Fikayo Tomori បាន​ខ្ចី​ជើង​ពាក់​កណ្តាល​រដូវកាល​ឆ្នាំ 2020-2021 ហើយ​​ទម្រង់​លេង​របស់​គាត់​បាន​ធ្វើ​ឲ្យ AC Milan សម្រេច​ចិត្ត​ទិញ​ផ្ដាច់​កុងត្រា​គាត់​នៅ​ចុង​បញ្ចប់​នៃ​រដូវកាល​ក្នុង​ឆ្នាំ​នោះ ជាមួយ​នឹង​តម្លៃ​ផ្ទេរ 27.4 លានផោន។ គិត​ចាប់​តាំង​ពីរ​ពេល​នោះ​មក Fikayo Tomori បាន​បង្ហាញ​ខ្លួន​សរុប​ចំនួន 112 ប្រកួត​ហើយ ក្នុង​នាម​ជា​ខ្សែការពារ​ដ៏​សំខាន់​របស់ AC Milan។

ទន្ទឹម​នឹង​នេះ​ដែរ កាល​ពី​រដូវកាល​មុន កីឡាករ​វ័យ 25 ឆ្នាំ​រូបនេះ បាន​បន្ត​កុងត្រា​ថ្មី​រយៈពេល​វែង​ជាមួយ​ក្លឹប​បច្ចុប្បន្ន​របស់​ខ្លួន ដែល​មាន​សុពលភាព​រហូត​ដល់​រដូវក្តៅ​ឆ្នាំ 2027។ ដោយ​ឡែក កាល​ពី​ពេល​ថ្មីៗ​នេះ របាយការណ៍​ដែល​បាន​ចុះ​ផ្សាយ​ដោយ Calciomercato បាន​អះអាង​ថា ក្លឹប PSG ធ្លាប់​ចាប់​អារម្មណ៍​ចង់​បាន Fikayo Tomori នៅ​ចុង​បញ្ចប់​រដូវកាល​មុន ដើម្បី​មក​ជំនួស​ខ្សែការពារ​ចាស់ Sergio Ramos ដែល​ចាកចេញ​ដោយ​គ្មាន​តម្លៃ​ខ្លួន។ គេ​បាន​ដឹង​ថា PSG បាន​បញ្ជូន​ភ្នាក់ងារ​របស់​ខ្លួន​ឲ្យ​ស្ទាបស្ទង់​ចិត្ត​ខ្សែការពារ​រូប​នេះ ប៉ុន្តែ Fikayo Tomori មិន​បាន​ចាប់​អារម្មណ៍​លើ​ការ​ផ្ទេរ​នេះ​ឡើយ ហើយ​ក៏​ត្រៀម​រួច​ស្រេច​ក្នុង​ការ​បដិសេធ​មិន​​ទៅ​លេង​នៅ​ប្រទេស​បារាំង​ផង​ដែរ។

ប្រភព: Sportsmole