បាល់ទាត់អន្តរជាតិ
Pep Guardiola ប្រាប់ឈ្មោះក្លឹប 2 ដែលនឹងប្រជែងពាន Premier League ជាមួយ Man City
គ្រូបង្វឹករបស់ក្លឹបមេឃខៀវលោក Pep Guardiola បានលើកយកឈ្មោះក្លឹបពីរដែលនឹងក្លាយជាគូប្រជែងពាន Premier League នៅរដូវកាលនេះ ជាមួយ Manchester City។ យ៉ាងណាមិញក្លឹបពីរដែលលោក Pep Guardiola បានលើកឈ្មោះយកមកនោះគឺមាន Arsenal និង Liverpool។
ដោយឡែកនៅថ្ងៃស្អែកនេះលោក Pep Guardiola នឹងដឹកនាំក្រុមការពារតំណែងជើងឯករបស់ខ្លួនទៅជួបប្រកួតនៅទឹកដី Emirates ដែលវាជាការប្រកួតដ៏តានតឹងមួយ ខណៈដែល Man City ត្រូវការ 3 ពិន្ទុ ដើម្បីឡើងទៅឈរនៅកំពូលតារាងសារជាថ្មី ស្របពេលដែល Arsenal កំពុងសម្លឹងមើល 3 ពិន្ទុដើម្បីតាមស្មើ Tottenham Hotspur ជាក្រុមលេខមួយ។
យ៉ាងណាការប្រកួតនេះ មិនមែនជាការប្រកួតកាត់សេចក្ដីក្នុងការលើកពានលីគនៅរដូវកាលនេះឡើយ ប៉ុន្តែលោក Pep Guardiola ជឿជាក់ថា Arsenal ក៏ដូចជា Liverpool នឹងក្លាយជាគូប្រជែងសម្រាប់ការលើកពាន Premier League នៅរដូវកាលនេះជាមួយក្រុមរបស់ខ្លួន។
ប្រភព: Dailypost NG