បាល់ទាត់អន្តរជាតិ
Barcelona នឹងត្រូវចំណាយប្រាក់យ៉ាងហោចណាស់ 80 លានអឺរ៉ូ ដើម្បីទិញផ្ដាច់កុងត្រារបស់ Joao Felix
ក្លឹបអ្នកមានបុណ្យ Barcelona នឹងត្រូវដាក់សំណើរយ៉ាងហោចណាស់ 80 លានអឺរ៉ូ (69 លានផោន) ដើម្បីចុះហត្ថលេខាទិញផ្ដាច់កុងត្រាខ្សែប្រយុទ្ធរបស់ក្លឹប Atletico Madrid គឺកីឡាករ Joao Felix នៅរដូវក្ដៅឆ្នាំក្រោយ ពេលដែលទីផ្សារដោះដូរកីឡាករបើកឡើងវិញ។
បច្ចុប្បន្នកីឡាករសញ្ជាតិព័រទុយហ្គាល់រូបនេះ បានចូលរួមជាមួយក្លឹបយក្សកាតាឡាន់ក្នុងលក្ខខណ្ឌខ្ចីជើងពី Atletico Madrid កាលពីខែមុន ហើយគាត់បានចាប់ផ្តើមជាមួយនឹងទម្រង់លេងដ៏លេចធ្លោរនៅ Camp Nou ដោយស៊ុតបញ្ចូលទីបាន 3 គ្រាប់ និងបញ្ជូនបាល់ឲ្យមិត្តរួមក្រុមបានចំនួន 2 ដង ក្នុងការបង្ហាញខ្លួនចំនួន 7 ប្រកួតកន្លងមក។
ច្បាស់ណាស់ថា ប្រសិនបើ Joao Felix នៅតែរក្សាទម្រង់លេងដ៏ល្អរបស់ខ្លួន Barcelona នឹងព្យាយាមប្រមូលប្រាក់ដើម្បីទិញផ្ដាច់កុងត្រាគាត់ពី Atletico Madrid។ ថ្មីៗនេះយោងតាមរបាយការណ៍ពី AS បានឲ្យដឹងថា ក្លឹប Atletico Madrid នឹងបើកចិត្តលក់កីឡាករវ័យ 23 ឆ្នាំរូបនេះដោយមិនស្ទាក់ស្ទើរឡើយ ប៉ុន្តែពួកគេចង់បានប្រាក់យ៉ាងហោចណាស់ 80 លានអឺរ៉ូ (69 លានផោន)។ គេបានដឹងថា តម្លៃនេះអាចជាបញ្ហាដ៏សំខាន់មួយសម្រាប់ Barcelona ដោយសារតែបញ្ហាហិរញ្ញវត្ថុរបស់ពួកគេនៅតែជាចំណោទបញ្ហានៅឡើយ។
ប្រភព: Sportsmole