Eden Hazard ប្រកាស​ចូល​និវត្តន៍​ពី​បាល់ទាត់​នៅ​ក្នុង​វ័យ 32 ឆ្នាំ

អតីត​ខ្សែ​ប្រយុទ្ធ​ស្លាប​របស់​ក្លឹប​តោខៀវ Chelsea និង Real Madrid គឺ​កីឡាករ Eden Hazard បាន​ប្រកាស​ចូលនិវត្តន៍​ពី​បាល់ទាត់​ហើយ​នៅ​ថ្ងៃ​នេះ ក្នុង​វ័យ 32 ឆ្នាំ។ យ៉ាង​ណា​មិញ Hazard បាន​ចូលរួម​ជាមួយ​ Real Madrid ដោយ​ផ្ទេរ​ពី Chelsea ក្នុង​តម្លៃ​ផ្ទេរ 89 លានផោន ក្នុង​រដូវ​ក្តៅឆ្នាំ 2019 ប៉ុន្តែ​នៅ​ទឹកដី​អេស្ប៉ាញ​គាត់​ចំណាយ​ពេល​ស្ទើរតែទាំង​ស្រុង​ជាមួយ​នឹង​បញ្ហា​របួស។

អ្នកគាំទ្រ Real Madrid មិន​អាច​ទទួល​បាន Eden Hazard ដែល​មាន​ទម្រង់​លេង​ដូច​ការ​រំពឹង​ទុក​នោះ​ទេ ហើយ​ទីបំផុត​គាត់​ក៏​បាន​ចាកចេញ​ពី​ក្លឹប​យក្ស​អេស្ប៉ាញ​កាល​ពី​ដើម​រដូវកាល​នេះ។ ថ្វី​ត្បិតតែ​មិន​សូវ​បាន​ជួយ​ក្លឹប និង​មិន​សូវ​មាន​ឱកាស​ចូល​លេង​ច្រើន តែ​ក្នុង​រយៈ​ពេល 4 ឆ្នាំ​នៅ Real Madrid គាត់​បាន​ឈ្នះពាន UEFA Champions League មួយ, Club World Cup មួយ, European Super Cup មួយ, ពាន La Liga 2 ដង, Copa del Rey មួយ និង Spanish Super Cups 2 ដង។

បើ​យើង​ចោលភ្នែក​ក្រឡេក​មក​មើល​ពី​អតីត​កាល​មុន​ពេល​ដែល​គាត់​ចូលរួម​ជាមួយ Real Madrid ខ្សែប្រយុទ្ធ​សញ្ជាតិ​បែលហ្សិក​រូប​នេះ បាន​ចំណាយ​ពេល 7 ឆ្នាំ​នៅ Chelsea ជាមួយ​នឹង​ទម្រង់​លេង​ដ៏​អស្ចារ្យ​ដោយ​ស៊ុត​បញ្ចូលទី​បាន 110 គ្រាប់ និង 92 Assists ក្នុង​ការ​បង្ហាញ​ខ្លួន 352 ប្រកួត ហើយ​ពេល​នោះ​គាត់​ត្រូវ​បាន​គេ​ប្រដូច​ទៅ​ជា​អ្នក​ស្នង​តំណែង​របស់ Lionel Messi ទៀង​ផង។

ប្រភព: Sportsmole