Real Madrid ចេញ​សេចក្ដី​ថ្លែងការណ៍​បដិសេធ​ថា ពួក​គេ​មិន​បាន​ចរចា​ដោយ​សម្ងាត់​ជាមួយ Kylian Mbappe ឡើយ!!!

ក្លឹប​អធិរាជស Real Madrid បាន​ចេញ​សេចក្តី​ថ្លែងការណ៍​មួយ ដែល​ជា​ការ​ឆ្លើយ​តប​ទៅ​នឹង​ពាក្យចចាម​អារ៉ាម​មួយ​ដែល​ថា ពួក​គេ​បាន​លួច​ទាក់​ទង​ចរចាផ្ទាល់​ដោយ​សម្ងាត់​ទៅ​កាន់​ខ្សែប្រយុទ្ធ Kylian Mbappe របស់​ក្លឹប Paris-Saint Germain។ យ៉ាង​ណា​មិញ ទោះ​បី​ជា​ខ្សែ​ប្រយុទ្ធ​សញ្ជាតិ​បារាំង​រូប​នេះ​កន្លង​មក​ត្រូវ​បាន​គេដឹង​ថា ចង់​ចូលរួម​ជាមួយ Real Madrid ដោយ​បើក​ចំហរ​ក៏​ដោយ ប៉ុន្តែ​គាត់​នៅ​តែ​ជា​កម្មសិទ្ធិ​របស់ PSG។

Kylian Mbappe បច្ចុប្បន្ន​ត្រូវ​បាន​គេ​ចាត់​ទុក​ជា​ខ្សែប្រយុទ្ធ​ល្អ​បំផុត​ម្នាក់ ក្នុង​ពិភព​បាល់ទាត់។ កីឡាករ​សញ្ជាតិ​បារាំង​រូប​នេះ ក៏​ជា​កីឡាករ​ដ៏​សំខាន់​ម្នាក់​របស់​ក្លឹប​យក្ស​បារាំង PSG ផង​ដែរ ដោយ​គិត​មក​ទល់​នឹង​ពេល​នេះ​គាត់​បាន​ស៊ុត​បញ្ចូលទី​ 225 គ្រាប់ និង 99 Assists ហើយ ក្នុង​ការ​បង្ហាញ​ខ្លួន 273 ប្រកួត។

កុងត្រា​របស់ Kylian Mbappe នឹង​ផុត​កំណត់​នៅ​ចុង​បញ្ចប់​នៃ​រដូវកាល​នេះ ស្រប​ពេល​ដែល​ក្លឹប​ធំៗ​ជា​ច្រើន​ចង់​បាន​គាត់​ដែល​មិន​ត្រឹមតែ Real Madrid ប៉ុណ្ណោះ​ទេ គឺ Chelsea, Liverpool និង Manchester United ផង​ដែរ។ ប៉ុន្តែ​ទោះ​បី​ជា​​បែប​នេះ​ក៏​ដោយ Mbappe ហាក់​បាន​ទាក់ទង​ត្រូវ​រូវ​គ្នា​រួច​ទៅ​ហើយ​ជាមួយ Real Madrid។

ផ្ទុយ​មក​វិញ ក្លឹប​យក្ស​អេស្ប៉ាញ​មួយ​នេះ​បាន​បដិសេធ​ថា ពួក​គេ​មិន​បាន​ទាក់ទង​ជា​លក្ខណៈ​បុគ្គល​ជា​មួយ Kylian Mbappe ឡើយ។ យោងតាម​សេចក្ដី​ថ្លែង​ការណ៍​របស់ Real Madrid បាន​ឲ្យ​ដឹង​ថា៖ “នៅ​ក្នុង​ទិដ្ឋភាព​នៃ​ព័ត៌មាន​ដែល​បាន​ចេញ​ផ្សាយ​​នា​ពេល​ថ្មីៗ​នេះ ទាក់​ទង​នឹង​ការ​ចរចារ​រវាង​កីឡាករ Kylian Mbappe និង​ក្លឹប​របស់​យើង Real Madrid C.F. ក្លឹប​សូម​បញ្ជាក់​ថា ​ព័ត៌មាន​នេះ​ជា​ព័ត៌មាន​មិន​ពិត ហើយ​​គ្មាន​ការ​ចរចា​បែប​នេះ​បាន​កើត​ឡើង​ជាមួយ​នឹង​កីឡាករ​ណា​ម្នាក់​ដែល​ជា​កម្មសិទ្ធិ​របស់ PSG នោះ​ទេ”។

ប្រភព: Metro